ശബരിമല : സന്നിധാനത്ത് അനധികൃതമായി മൊബൈൽ ഫോൺ ചാർജിംഗ് നടത്തിയ കേന്ദ്രത്തിനെതിരെ നടപടി. സന്നിധാനം സ്‌പെഷ്യൽ സ്‌ക്വാഡിന്റെ നേതൃത്വത്തിൽ ഇന്നലെ നടത്തിയ പരിശോധനയിലാണ് മാളികപ്പുറം ജി.കെ.ഡി ഗസ്റ്റ് ഹൗസിന് മുന്നിൽ അനധികൃതമായി മൊബൈൽ ബാറ്ററി ചാർജിംഗ് കേന്ദ്രം കണ്ടെത്തിയത്. സ്ഥാപനത്തിനെതിരെ നടപടിക്ക് ഇലക്ട്രിക്കൽ വിഭാഗത്തിന് നിർദേശം നൽകി. കഴിഞ്ഞദിവസം പാണ്ടിത്താവളത്തുള്ള ശാസ്താഹോട്ടലിന് സമീപം അനധികൃത മൊബൈൽ ബാറ്ററി ചാർജിംഗ് പോയിന്റ് സ്ഥാപിച്ച സ്ഥാപനത്തിന് എതിരെ നടപടി സ്വീകരിച്ചിരുന്നു. അയ്യപ്പഭക്തരുടെ മൊബൈൽ ഫോണുകൾ ചാർജ് ചെയ്യുന്നതിനായി കൂടുതൽ മൊബൈൽ ചാർജിംഗ് പോയിന്റുകൾ സ്ഥാപിക്കാൻ ദേവസ്വംബോർഡിന് ശുപാർശ നൽകിയിട്ടുണ്ടെന്ന് സന്നിധാനം ഡ്യൂട്ടി മജിസ്‌ട്രേറ്റ് അറിയിച്ചു.