ചെങ്ങന്നൂർ: ചെങ്ങന്നൂർ ആൽത്തറ ജംഗ്ഷന് സമീപം 3.31 കോടി രൂപ ചിലവഴിച്ച് ആധുനിക സൗകര്യങ്ങളോടെ നിർമ്മിച്ച വിദ്യാഭ്യാസ കോംപ്ലക്‌സിന്റെ ഉദ്ഘാടനം ജനുവരി 14ന് മന്ത്രി വി.ശിവൻകുട്ടി നിർവഹിക്കും. ചെങ്ങന്നൂർ എ.ഇ.ഒ ഓഫീസ്, പത്തനംതിട്ട, ആലപ്പുഴ ജില്ലകളിലായി പ്രവർത്തനമേഖലയുള്ള വൊക്കേഷണൽ ഹയർ സെക്കൻഡറി അസിസ്റ്റന്റ് ഡയറക്ടർ ഓഫീസ്, ഹയർ സെക്കൻഡറി റീജിയണൽ ഡെപ്യൂട്ടി ഡയറക്ടർ ഓഫീസ് എന്നിവയാണ് ഇവിടെ പ്രവർത്തിക്കുന്നത്. 9081 ചതുരശ്രയടി വിസ്തീർണത്തിൽ മൂന്നു നിലകളിലായാണ് കെട്ടിടം നിർമ്മാണം പൂർത്തീകരിച്ചത്. 70 വർഷത്തിലേറെ പഴക്കമുള്ള കെട്ടിടത്തിലായിരുന്നു എ.ഇ.ഒ പ്രവർത്തിച്ചിരുന്നത്. പുതിയ കെട്ടിട നിർമ്മണം ഇവിടെ ആരംഭിച്ചപ്പോൾ ഓഫീസ് പ്രവർത്തനം ചെങ്ങന്നൂർ ഡയറ്റ് ഹോസ്റ്റലിലെ ഇടുങ്ങിയ മുറിയിലേക്ക് മാറ്റുകയായിരുന്നു. ചെങ്ങന്നൂർ റെയിൽവേ സ്റ്റേഷനു സമീപം വാടകക്കെട്ടിടത്തിൽ പ്രവർത്തിക്കുന്ന ഹയർ സെക്കൻഡറി ആർ.ഡി.ഡി ഓഫീസും സ്ഥല സൗകര്യങ്ങൾ ഇല്ലാതെ ബുദ്ധിമുട്ടുകയായിരുന്നു. മിനി സിവിൽ സ്റ്റേഷന്റെ രണ്ടാം നിലയിലാണ് വൊക്കേഷണൽ ഹയർ സെക്കൻഡറി എ.ഡി ഓഫീസ് പ്രവർത്തിക്കുന്നത്. ഈ ഓഫീസുകളുടെ സ്ഥലപരിമിതിയടക്കമുള്ള പോരായ്മകൾക്ക് ഇതോടെ പരിഹാരമാകും. ഗ്രൗണ്ട് ഫളോറിൽ എ.ഇ.ഒ ഓഫീസും, വൊക്കേഷണൽ ഹയർ സെക്കൻഡറി അസിസ്റ്റന്റ് ഡയറക്ടർ ഓഫീസ്, ഹയർ സെക്കൻഡറി ആർ.ഡി.ഡി ഓഫീസ് എന്നിവ ഒന്നും രണ്ടും നിലകളിലുമാവും പ്രവർത്തിക്കുക.വിദ്യാഭ്യാസ ഓഫീസുകൾ ഒരു കെട്ടിടത്തിൽ പ്രവർത്തിക്കുന്നതോടെ അദ്ധ്യാപകർക്കും വിദ്യാർത്ഥികൾക്കും സ്‌കൂൾ ജീവനക്കാർക്കും കൂടുതൽ സൗകര്യപ്രദമാകുമെന്ന് സജി ചെറിയാൻ എം.എൽ.എ അറിയിച്ചു. പൊതു വിദ്യാഭ്യാസ വകുപ്പിന്റെ ഫണ്ട് ഉപയോഗിച്ചു നിർമ്മിച്ച അങ്ങാടിക്കൽ തെക്ക് ഗവ.ഹയർ സെക്കൻഡറി സ്‌കൂൾ, ചെങ്ങന്നൂർ ഗവ.ഗേൾസ് ഹൈസ്‌കൂൾ എന്നിവയുടെ പുതിയ കെട്ടിടങ്ങളുടെ ഉദ്ഘാടനവും ജനുവരി 14ന് മന്ത്രി നിർവഹിക്കും.