കൊടകര: സമഗ്ര ശിക്ഷാ കേരളം കൊടകര ബി.ആർ.സിയുടെ നേതൃത്വത്തിൽ നടത്തിയ ലോക ഭിന്നശേഷി ദിനാചരണം ബ്ലോക്ക് പഞ്ചായത്ത് പ്രസിഡന്റ് എം.ആർ രഞ്ജിത് ഉദ്ഘാടനം ചെയ്തു. അളഗപ്പനഗർ പഞ്ചായത്തിൽ ഓവർസിയറായ, സിന്റോ ആന്റണിയായിരുന്നു മുഖ്യാതിഥി.

പരിമിതികളെ മറികടന്ന് ജീവിത വിജയം നേടിയ സിന്റോ ആന്റണി, ഉജ്ജ്വല ബാല്യ പുരസ്‌കാര ജേതാവ്, കോടാലി ഗവ.എൽ.പി.സ്‌കൂൾ രണ്ടാം ക്ലാസ് വിദ്യാർത്ഥിനി, കൃഷ്ണവേണി എന്നിവരെ ആദരിച്ചു. വിദ്യാർത്ഥികളുടെയും ബി.ആർ.സി അദ്ധ്യാപകരുടെയും വിവിധ കലാപരിപാടികൾ അരങ്ങേറി. മിമിക്രി കലാകാരനും ഗായകനുമായ മുരളി ചാലക്കുടി അവതരിപ്പിച്ച കലാവിരുന്ന് ആഘോഷങ്ങൾക്ക് മാറ്റുകൂട്ടി.

ബി.ആർ.സി പരിധിയിലെ വിവിധ വിദ്യാലയങ്ങളിൽ നിന്ന് തെരഞ്ഞെടുക്കപ്പെട്ട 50 ഭിന്നശേഷിക്കാരായ വിദ്യാർത്ഥികളും അവരുടെ രക്ഷിതാക്കളും പങ്കെടുത്തു. കൊടകര ഗവ.എൽ.പി സ്‌കൂളിൽ പഞ്ചായത്ത് പ്രസിഡന്റ് അമ്പിളി സോമൻ അദ്ധ്യക്ഷത വഹിച്ചു. തൃക്കൂർ പഞ്ചായത്ത് പ്രസിഡന്റ്, സൈമൺ നമ്പാടൻ, ബ്ലോക്ക് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്‌സൺ സജിത രാജീവ്, അംഗം സി.ഡി സിബി, ഡയറ്റ് ഫാക്കൽറ്റി ഡോ.പി.സി.സിജി, ബി.പി.സി ഫേബ കെ.ഡേവിഡ്, മുൻ ബി.പി.സി കെ.നന്ദകുമാർ, ബി.ആർ.സി ട്രെയിനർ സി.കെ രാധാകൃഷ്ണൻ, സി.ആർ.സി കോഡിനേറ്റർ വി.ആർ. നിഷ എന്നിവർ പങ്കെടുത്തു.