തൃശൂർ: അഖിലേന്ത്യാ കിസാൻസഭ (എ.ഐ.കെ.എസ്) 35-ാം ദേശീയ സമ്മേളനം 13 മുതൽ 16 വരെ തൃശൂരിൽ നടക്കും. 13ന് പുഴയ്ക്കൽ ലുലു കൺവെൻഷൻ സെന്ററിൽ ജനറൽ സെക്രട്ടറി ഹനൻ മൊള്ള ഉദ്ഘാടനം ചെയ്യും. 16ന് വൈകിട്ട് തേക്കിൻകാട് മൈതാനത്ത് കർഷക മഹാറാലി മുഖ്യമന്ത്രി പിണറായി വിജയൻ ഉദ്ഘാടനം ചെയ്യും. റാലിയിൽ ലക്ഷം പേർ പങ്കെടുക്കുമെന്ന് സംഘാടകർ വാർത്താസമ്മേളനത്തിൽ അറിയിച്ചു. എല്ലാ സംസ്ഥാനങ്ങളിൽ നിന്നുമായി 803 പ്രതിനിധികൾ പങ്കെടുക്കും.

അഖിലേന്ത്യ പ്രസിഡന്റ് അശോക് ധാവ്‌ളെ, വൈസ് പ്രസിഡന്റ് എസ്. രാമചന്ദ്രൻ പിള്ള, ജോയിന്റ് സെക്രട്ടറി ഇ.പി. ജയരാജൻ എന്നിവർ പങ്കെടുക്കും. പൊതുസമ്മേളന നഗരിയിലേക്കുള്ള പതാക, കൊടിമര ജാഥകൾക്കും ദീപശിഖാ പ്രയാണത്തിനും ഇന്ന് തൃശൂരിൽ വരവേൽപ്പ് നൽകും. മൂന്നു ജാഥകൾക്കും രാവിലെ ഒമ്പതിന് സംഘാടക സമിതി നേതൃത്വത്തിൽ ജില്ലാ അതിർത്തികളിൽ സ്വീകരണം നൽകും. പുന്നപ്ര വയലാർ സ്മൃതി മണ്ഡപത്തിൽ നിന്ന് കർഷകസംഘം സംസ്ഥാന പ്രസിഡന്റ് എം. വിജയകുമാർ നയിക്കുന്ന പതാക ജാഥയാണ് പൊങ്ങത്തെത്തുക.

കയ്യൂരിൽ നിന്ന് സംസ്ഥാന സെക്രട്ടറി വത്സൻ പനോളി നയിക്കുന്ന കൊടിമരജാഥ കടവല്ലൂരിലെത്തും. കീഴ്‌വെൺമണിയിൽ നിന്ന് അഖിലേന്ത്യ ജോയിന്റ് സെക്രട്ടറി വിജു കൃഷ്ണന്റെ നേതൃത്വത്തിലും തെലങ്കാനയിൽനിന്ന് പി. കൃഷ്ണപ്രസാദിന്റെ നേതൃത്വത്തിലും ആരംഭിച്ച ദീപശിഖാ പ്രയാണവും വാണിയമ്പാറയിൽ എത്തിച്ചേരും. സംഘാടകസമിതി ഭാരവാഹികൾ സ്വീകരിക്കും. തൃശൂർ ശക്തൻസ്റ്റാൻഡിൽ ജാഥകൾ സംഗമിക്കും.

വിദ്യാർത്ഥി കോർണറിലെ പൊതുസമ്മേളന നഗരിയിൽ സംഘാടകസമിതി ചെയർമാൻ കെ. രാധാകൃഷ്ണൻ പതാക ഉയർത്തും. അഖിലേന്ത്യ ജോയിന്റ് സെക്രട്ടറി ഇ.പി. ജയരാജൻ ദീപശിഖ തെളിക്കും. കിസാൻ സഭ അഖിലേന്ത്യ സമ്മേളനത്തിന്റെ ഭാഗമായി കർഷക സമര നായകരെ ആദരിക്കും. കർഷകപോരാട്ടത്തെ നയിച്ച രാകേഷ് ടിക്കായത്ത്, ദർശൻപാൽ, രാജാറാം സിംഗ്, ജോഗീന്ദർ സിംഗ് ഉഗ്രഹാൻ, അതുൽകുമാർ അഞ്ജൻ എന്നിവരെയാണ് ആദരിക്കുന്നത്. 13ന് പുഴയ്ക്കൽ ലുലു കൺവെൻഷൻ സെന്ററിലെ പ്രതിനിധി സമ്മേളനവേദിയിലാണ് ആദരം.

15ന് ദേശീയ സെമിനാർ നടക്കും. വൈകിട്ട് നാലിന് വിദ്യാർത്ഥി കോർണറിൽ നടക്കുന്ന സെമിനാറിൽ സി.പി.എം പൊളിറ്റ്ബ്യൂറോ അംഗം പ്രകാശ് കാരാട്ട്, എ. വിജയരാഘവൻ, സാമ്പത്തിക വിദഗ്ദ്ധൻ പ്രഭാത് പട്‌നായ്ക്, പ്രൊഫ. ജഗ്‌മോഹൻ എന്നിവർ പങ്കെടുക്കും. വാർത്താസമ്മേളനത്തിൽ സംഘാടകസമിതി ജനറൽ കൺവീനർ എ.സി. മൊയ്തീൻ എം.എൽ.എ, ട്രഷറർ എം.എം. വർഗീസ്, കർഷകസംഘം ജില്ലാ സെക്രട്ടറി എ.എസ്. കുട്ടി, കെ.വി. അബ്ദുൾഖാദർ എന്നിവരും പങ്കെടുത്തു.