ഗുരുവായൂർ: ഗുരുവായൂർ റെയിൽവേ മേൽപ്പാലത്തിന്റെ പില്ലർ നിർമ്മാണവുമായി ബന്ധപ്പെട്ട് നിലനിന്നിരുന്ന തടസങ്ങൾ നീങ്ങിയതായി എൻ.കെ അക്ബർ എം.എൽ.എ അറിയിച്ചു. ഇതുമായി ബന്ധപ്പെട്ട് ആർ.ബി.ഡി.സി.കെ ഉദ്യോഗസ്ഥരുമായി എം.എൽ.എ തിരുവനന്തപുരത്ത് കൂടിക്കാഴ്ച നടത്തി. റെയിൽവേ മേൽപ്പാലത്തിന്റെ പില്ലർ നിർമ്മാണത്തിനായി സ്റ്റാറ്റിക് ടെസ്റ്റ് നടത്തണമെന്നാണ് റെയിൽവേ അറിയിച്ചിരുന്നത്. എന്നാൽ സ്റ്റാറ്റിക് ടെസ്റ്റ് പഴയതും കാലതാമസം എടുക്കുന്നതുമാണ്. അതിനാൽ പില്ലർ നിർമ്മാണത്തിന്റെ ഭൂമിയുടെ പരിശോധനയ്ക്കായി ഡൈനാമിക് ടെസ്റ്റ് വേണമെന്ന ആവശ്യം റെയിൽവേ അംഗീകരിച്ചു. ഒരു ദിവസം കൊണ്ട് തന്നെ ഡൈനാമിക് ടെസ്റ്റ് പൂർത്തീകരിക്കാനും ഒരാഴ്ചയ്ക്കകം നിർമ്മാണ പ്രവൃത്തികൾ പുനരാരംഭിക്കാനും കഴിയുമെന്നാണ് പ്രതീക്ഷിക്കുന്നത്. നിലവിലുള്ള തടസങ്ങളെല്ലാം പരിഹരിച്ച് റിറ്റൈനിംഗ് വാൾ ഉൾപ്പെടെയുള്ള നിർമ്മാണപ്രവൃത്തികളും അടിയന്തരമായി ആരംഭിക്കാൻ തീരുമാനിച്ചതായി ആർ.ബി.ഡി.സി.കെ ഉദ്യോഗസ്ഥർ അറിയിച്ചതായി എം.എൽ.എ പറഞ്ഞു.