അക്കിക്കാവ് പി.എസ്.എം ഡെന്റൽ കോളേജിൽ

കുന്നംകുളം: അക്കിക്കാവ് പി.എസ്.എം ഡെന്റൽ കോളേജിൽ സ്റ്റൈപ്പന്റ് വർദ്ധിപ്പിക്കാത്തതിൽ പ്രതിഷേധിച്ച് ഹൗസ് സർജൻമാർ പണിമുടക്കിയത് രോഗികളെ വലച്ചു. ഇന്നലെ രാവിലെ എട്ട് മുതൽ ആരംഭിച്ച സമരം ഉച്ചക്ക് രണ്ട് വരെ തുടർന്നു. സമരം ഇന്നും തുടരും. സർക്കാർ ഡെന്റൽ കോളേജുകളിൽ 20,000 മുതൽ 26,000 വരെയാണ് സ്റ്റൈപ്പന്റായി നൽകുന്നത്. എന്നാൽ ചില സ്വകാര്യ മെഡിക്കൽ കോളേജുകളിൽ 6,000 രൂപയും പി.എസ്.എമ്മിൽ ഇത് 4,000 രൂപയുമാണ്. ഒരാഴ്ച മുമ്പേ സമര നോട്ടീസ് നൽകി മാനേജ്‌മെന്റിനോട് ഇക്കാര്യം ആവശ്യപ്പട്ടെങ്കിലും നടപടിയുണ്ടായില്ല. 110ഓളം ഹൗസ് സർജന്മാർ സമരത്തിൽ പങ്കെടുക്കുന്നുണ്ട്. കഴിഞ്ഞ വർഷങ്ങളിൽ ഫീസിനത്തിൽ ഇരട്ടിയോളം തുകയാണ് വിദ്യാർത്ഥികൾ നൽകിയതെന്നും ഈ സാഹചര്യത്തിൽ പതിനായിരം രൂപയെങ്കിലും സ്റ്റൈപ്പന്റ് നൽകണമെന്നുമാണ് ഇവരുടെ ആവശ്യം.