തൃശൂർ: ഉപഭോക്തൃ വാരാചരണത്തിന്റെ ഉദ്ഘാടനം കളക്ടറേറ്റ് കോൺഫറൻസ് ഹാളിൽ പി. ബാലചന്ദ്രൻ എം.എൽ.എ നിർവഹിച്ചു. കർശനമായ നിയമങ്ങളും മാനദണ്ഡങ്ങളും നിലവിലുണ്ടെങ്കിലും ഉപഭോക്താക്കൾ കബളിപ്പിക്കപ്പെടുന്ന അവസ്ഥയാണെന്നും ഇതിനെതിരെ ജനങ്ങളെ ബോധവാന്മാരാക്കുകയാണ് ലക്ഷ്യമെന്നും അദ്ദേഹം പറഞ്ഞു. ദേശീയ ഉപഭോക്തൃ സംരക്ഷണ വാരാചരണത്തിന്റെ ഭാഗമായി ഭക്ഷ്യപൊതുവിതരണ ഉപഭോക്തൃകാര്യ വകുപ്പാണ് പരിപാടി സംഘടിപ്പിച്ചത്.

ഉപഭോക്തൃസംരക്ഷണം വെല്ലുവിളികളും, മുന്നോട്ടുള്ള പ്രയാണവുമെന്ന വിഷയത്തിൽ നടന്ന സെമിനാറിൽ ജില്ലാ ഉപഭോക്തൃ കമ്മിഷൻ അംഗം ആർ. റാംമോഹൻ വിഷയം അവതരിപ്പിച്ചു. ക്വിസ്, ഉപന്യാസം, പ്രസംഗം മത്സരത്തിലെ വിജയികൾക്ക് ജില്ലാ പഞ്ചായത്ത് വൈസ് പ്രസിഡന്റ് ഷീന പറയങ്ങാട്ടിൽ സമ്മാനം വിതരണം ചെയ്തു. ജില്ലാ സപ്ലൈ ഓഫീസർ പി.ആർ. ജയചന്ദ്രൻ, താലൂക്ക് സപ്ലൈ ഓഫീസർ സാബു പോൾ തട്ടിൽ എന്നിവർ പങ്കെടുത്തു.