തിരുവനന്തപുരം: കേരളത്തിലെ മികച്ച രണ്ട് ചിത്രകാരന്മാരുടെ സംഗമവേദിയായി തൈക്കാട് ഗണേശത്തിൽ നടക്കുന്ന സൂര്യ ഫെസ്റ്റിവൽ.ആർട്ടിസ്റ്റ് ബി.ഡി.ദത്തനും നേമം പുഷ്പരാജും ഒരുമിച്ചുള്ള ചിത്രപ്രദർശനമാണ് ഇന്നലെ തൈക്കാട് ഗണേശത്തിൽ ആരംഭിച്ചത്.ബി.ഡി.ദത്തൻ,നേമം പുഷ്‌പരാജ് ആർട്ടിസ്റ്റ് ഭട്ടതിരി,​ കാരയ്ക്കാമണ്ഡപം വിജയകുമാർ,​വേണു തെക്കേമഠം,​ടി.സി.രാജൻ എന്നിവർ ചേർന്ന് കാൻവാസിൽ ചിത്രം വരച്ചാണ് പ്രദർശനം ഉദ്ഘാടനം ചെയ്തത്. പ്രകൃതിയുടെ സ്വപ്നസദൃശ ഭാവങ്ങളാണ് ബൊട്ടാണിക്കൽ ഫാന്റസി എന്ന സീരീസിലൂടെ ബി.ഡി.ദത്തൻ വരച്ചുകാട്ടുന്നത്. 11 ചിത്രങ്ങളാണ് ദത്തന്റേതായി പ്രദർശനത്തിനുള്ളത്. ഈ പരമ്പരയിലെ ചിത്രങ്ങളുടെ തലസ്ഥാനത്തെ ആദ്യ പ്രദർശനമാണിത്. സാമൂഹിക പ്രശ്നങ്ങളും രാഷ്ട്രീയവുമൊക്കെയാണ് 'ഡിസ്‌റ്റോപ്പിയ' എന്ന പേരിലുള്ള നേമം പുഷ്പപരാജിന്റെ കാൻവാസിൽ വിരിയുന്നത്. മൂല്യച്യുതി സംഭവിക്കുന്ന സമൂഹത്തിന്റെ നേർക്കാഴ്ചയാണ് പുഷ്പരാജിന്റെ 12 ചിത്രങ്ങളിലുള്ളത്. കോടതികളിലെ അനീതി,​ സ്‌ത്രീപീഡനം തുടങ്ങിയവയെല്ലാം ചിത്രങ്ങൾക്ക് വിഷയമായിട്ടുണ്ട്. 8 വരെ വൈകിട്ട് നാല് മുതൽ 9 വരെയാണ് പ്രദർശനം.