തിരുവനന്തപുരം: ആത്മീയതയിൽ വേരൂന്നിയാണ് ഇന്ത്യ വികസനക്കുതിപ്പ് നടത്തുന്നതെന്ന് കേന്ദ്രമന്ത്രി വി.മുരളീധരൻ. കോട്ടയ്ക്കകം വൈകുണ്ഠത്ത് നടക്കുന്ന 38-ാമത് അഖില ഭാരത ശ്രീമദ് ഭാ​ഗവത മഹാസത്രത്തിന്റെ തീം സോം​ഗ് 'മധുരം ഭാഗവതം" അഭേദാശ്രമം ഹാളിൽ പുറത്തിറക്കുകയായിരുന്നു അദ്ദേഹം.

സർവ്വവേദാന്ത സാരമാണ് ഭാഗവതം. ഒരു രാജ്യത്തിനും ഇല്ലാത്ത ആത്മീയ പാരമ്പര്യം ഭാരതത്തിനുണ്ട്. ഹൈന്ദവ ആചാരങ്ങളും ആരാധനാലയങ്ങളും വെല്ലുവിളി നേരിടുന്ന കാലമാണിത്. ഈ വെല്ലുവിളികളെ നേരിടാൻ ഇത്തരം വേദികൾ സജീവമാകണം- അദ്ദേഹംപറഞ്ഞു.

ഭാഗവത മഹാസത്രം നിർവഹണ സമിതി ചെയർമാൻ ആർ. രാമചന്ദ്രൻ നായർ അദ്ധ്യക്ഷനായി. രക്ഷാധികാരി റാണി മോഹൻദാസ്, വൈസ് ചെയർമാൻ എം.​ ഗോപാൽ, അഡ്വ. പി.എസ് ശ്രീകുമാർ, ജി.വിജയകുമാർ, ജയശ്രീ ​ഗോപാലകൃഷ്ണൻ, മുക്കംപാലമൂട് ​രാധാകൃഷ്ണൻ, ശ്രീവത്സൻ നമ്പൂതിരി തുടങ്ങിയവർ സംസാരിച്ചു. കൈതപ്രം ദാമോദരൻ നമ്പൂതിരി രചിച്ച് കൈതപ്രം ദീപാങ്കുരൻ സംഗീതം നൽകി ഡോ. ഭാവന രാധാകൃഷ്ണനും കൈതപ്രം ദീപാങ്കുരനും ചേർന്നാണ് മധുരം ഭാഗവതം തീം സോംഗ് തയ്യാറാക്കിയത്.