തിരുവനന്തപുരം; നാരായണ മന്ത്രങ്ങളിൽ മുഖരിതമായി അനന്തപുരി, ഇനി പത്ത് ദിനം ശ്രീ​ഗുരുവായൂരപ്പ ഉപാസനകേന്ദ്രമായി തലസ്ഥാനം ​ മാറും. ഭക്തിസാന്ദ്രമായ അന്തരീക്ഷത്തിൽ കിഴക്കേനടയിലെ ശ്രീവൈകുണ്ഠത്ത് 38ാമത് അഖില ഭാരത ശ്രീമദ് ഭാ​ഗവത മഹാസത്രത്തിന് തുടക്കമായി.

പുലർച്ചെ നാലോടെ ശ്രീ മഹാ​ഗണപതി ഹോമത്തോടെ ചടങ്ങുകൾ ആരംഭിച്ചു. തുടർന്ന് ​ഗുരുവായൂർ ക്ഷേത്ര തന്ത്രി ചേന്നാസ് ദിനേശൻ നമ്പൂതിരിപ്പാടിന്റെ നേതൃത്വത്തിൽ ദ്വാദശനാമപൂജയും നടന്നതോടെയാണ് ശ്രീമദ് ഭാ​ഗവത പാരായണത്തിന് തുടക്കമായത്. വൈകിട്ട് നാലോടെ സത്രമണ്ഡപത്തിൽ പ്രതിഷ്ഠിക്കാനുള്ള ശ്രീകൃഷ്ണ വി​ഗ്രഹം വഹിച്ചുകൊണ്ടുള്ള ഘോഷയാത്ര പഴവങ്ങാടി ​ഗണപതി ക്ഷേത്രത്തിനു മുന്നിൽ നിന്നാരംഭിച്ചു. തുടർന്ന് വൈകുണ്ഠത്ത് എത്തിച്ചേർന്ന വി​ഗ്രഹം ഗുരുവായൂർ ക്ഷേത്ര തന്ത്രി ചേന്നാസ് ദിനേശൻ നമ്പൂതിരിപ്പാടിന്റെ നേതൃത്വത്തിൽ പ്രതിഷ്ഠിച്ചശേഷം കൊടി ഉയർത്തി ഭദ്രദീപം തെളിച്ചു. തുടർന്ന് നടന്ന ചടങ്ങിൽ ഗോവ ​ഗവർണർ പി.എസ്. ശ്രീധരൻപിള്ള അഖില ഭാരത ശ്രീമദ് ഭാ​ഗവത മഹാസത്രം ഉദ്ഘാടനം ചെയ്തു. നമ്മുടെ പാഠ്യപദ്ധതികളിൽ ഭാ​ഗവതം ഉൾപ്പെടെയുള്ളവ പഠിപ്പിക്കുന്ന സമ്പ്രദായം ഉണ്ടായാൽ നല്ലതെന്ന് ഉദ്ഘാടന പ്രസം​ഗത്തിൽ ശ്രീധരൻപിള്ള പറഞ്ഞു.

സത്ര നിർവഹണ സമിതി ചെയർമാൻ ആർ. രാമചന്ദ്രൻനായർ അദ്ധ്യക്ഷത വഹിച്ച ചടങ്ങിൽ അശ്വതി തിരുനാൾ ​ഗൗരിലക്ഷ്മിബായി ഭ​ഗവത​ഗ്രന്ഥം സമർപ്പിച്ച് ഭാ​ഗവത സന്ദേശം കൈമാറി. സ്വാമി ​ഗുരുരത്നം ജ്ഞാനതപസ്വി അനു​ഗ്രഹ പ്രഭാഷണം നടത്തി. രമേശ് ചെന്നിത്തല എം.എൽ.എ, സ്വാമി അദ്ധ്യാത്മാനന്ദസരസ്വതി, മഹാസത്ര സമിതി പ്രസിഡന്റ് കെ. ശിവശങ്കരൻ, ഡോ. ഉഷ രാജവാര്യർ തുടങ്ങിയവർ സംസാരിച്ചു. വർക്കിം​ഗ് ചെയർമാൻ ജി. രാജ്മോഹൻ സ്വാ​ഗതവും പ്രോ​ഗ്രാം കമ്മിറ്റി ചെയർമാൻ എസ്. നാരായണ സ്വാമി നന്ദിയും പറഞ്ഞു.