തിരുവനന്തപുരം:സ്ത്രീവിരുദ്ധ പരാമർശം നടത്തിയ നഗരസഭാ പൊതുമരാമത്ത് സ്റ്റാൻഡിംഗ് കമ്മിറ്റി ചെയർമാൻ ഡി.ആർ.അനിലിന്റെ ഓഫീസിലേക്ക് നടത്തിയ മാർച്ചിനിടെ പൊലീസ് അറസ്റ്റ് ചെയ്ത മഹിളാമോർച്ച അടക്കമുള്ള ബി.ജെ.പി പ്രവർത്തകർക്ക് കോടതി ജാമ്യം അനുവദിച്ചു. മഹിളാമോർച്ച ജില്ലാ പ്രസിഡന്റ് ജയാരാജീവ്,​നേതാക്കളായ ബീന,​മിനി,​ അജിതകുമാരി,​അഞ്ജന,​ ലതികാപ്രദീപ്,​അഭിജിത്,​ഹരിലാൽ,​മണികണ്ഠൻ,​പ്രതാപൻ,​നന്ദു എന്നിവരാണ് ഇന്നലെ വൈകിട്ടോടെ ജയിൽ മോചിതരായത്.തിങ്കളാഴ്ച നടത്തിയ മാർച്ചിനിടെ ഇ.കെ.നായനാർ ട്രസ്റ്റിന്റെ ഓഫീസ് പ്രവർത്തകർ അടിച്ചുതകർക്കുകയും കരി ഓയിൽ ഒഴിക്കുകയും ചെയ്തിരുന്നു.

 ഡി.ആർ.അനിലിന്റെ ഓഫീസ് ഉപരോധിച്ചു

അതിനിടെ,​ ഇന്നലെ ഡി.ആർ.അനിലിന്റെ നഗരസഭയിലെ ഓഫീസ് ബി.ജെ.പി കൗൺസിലർമാർ ഉപരോധിച്ചു.കൗൺസിൽ യോഗത്തിനിടെ ബി.ജെ.പി വനിതാ കൗൺസിലർമാർക്കെതിരെ സ്ത്രീവിരുദ്ധ പരാർമശം നടത്തിയ അനിലിനെ പുറത്താക്കണമെന്നാവശ്യപ്പെട്ടായിരുന്നു ഉപരോധം. എം.ആർ.ഗോപൻ,​ വി.ജി.ഗിരികുമാർ,​ സിമി ജ്യോതിഷ് തുടങ്ങിയവർ നേതൃത്വം നൽകി.സമരം നടക്കുമ്പോൾ അനിൽ ഓഫീസിലുണ്ടായിരുന്നില്ല.നഗരസഭയിലെ അഴിമതിക്കും പിൻവാതിൽ നിയമനത്തിനെതിരെ ശക്തമായ സമരവുമായി മുന്നോട്ടുപോകുമെന്ന് ബി.ജെ.പി നേതാക്കൾ അറിയിച്ചു.