നെയ്യാറ്റിൻകര: കൊവിഡാനന്തരം കെ.എസ്.ആർ.ടി.സി ആരംഭിച്ച ബഡ്ജറ്റ് ടൂറിസം പദ്ധതി നെയ്യാറ്റിൻകര ഡിപ്പോയിൽ നിന്ന് നൂറ് യാത്രകൾ പിന്നിടുന്നു. ജനുവരി 9ന് കൊല്ലം മൺറോതുരുത്തിലേക്ക് കെ.എസ്.ആർ.ടി.സി ഫാസ്റ്റ് പാസഞ്ചറിൽ അമ്പത് യാത്രക്കാരുമായിട്ട് തുടങ്ങിയ യാത്രയാണ് പിന്നീട് സൂപ്പർ ഫാസ്റ്റ് ബോണ്ട്,എ.സി,ഡീലക്സ്,വോൾവോ ബസുകളിലായി 100ലെത്തി നിൽക്കുന്നത്. സംസ്ഥാനത്ത് ആദ്യമായി സ്വിഫ്റ്റ് ബസ് ബഡ്ജറ്റ് ടൂറിസം യാത്രയ്ക്കായി വിനിയോഗിച്ചതും നെയ്യാറ്റിൻകര യൂണിറ്റിൽ നിന്നായിരുന്നു. നിലവിൽ വാഗമൺ,മൂന്നാർ,തെന്മല, മലക്കപ്പാറ,കന്യാകുമാരി,പൊന്മുടി എന്നീ യാത്രകൾക്കാണ് ആവശ്യക്കാ‌‌ർ ഏറെ. സ്കൂളുകൾ, കോളേജുകൾ,ഫാമിലി ഗ്രൂപ്പുകൾ,ഓഫീസ് കൂട്ടായ്മകൾ,റസിഡന്റ്സ് അസോസിയേഷനുകൾ എന്നിവർക്കായി പ്രത്യേക ഗ്രൂപ്പ് പാക്കേജുകളും ഭിന്നശേഷിക്കാർക്കായി സൗജന്യ നിരക്കിലെ ഉല്ലാസ യാത്രകളും, സ്ത്രീകൾക്ക് മാതൃകയായി വനിതാ സൗഹൃദ യാത്രകളും നെയ്യാറ്റിൻകര ബഡ്ജറ്റ് ടൂറിസം വിഭാഗം ഒരുക്കിയിട്ടുണ്ട്. ഡിസംബറിൽ കെ.എസ്.ആർ.ടി.സി ആരംഭിച്ച നെയ്യാറ്റിൻകര - ഗവി വിനോദയാത്ര പദ്ധതി പ്രകാരം സംസ്ഥാനത്ത് ഏറ്റവുമധികം ഉല്ലാസയാത്രകൾ നെയ്യാറ്റിൻകര ഡിപ്പോയിൽ നിന്നാണ് സംഘടിപ്പിച്ചിട്ടുളളത്. ബഡ്ജറ്റ് ടൂറിസം പദ്ധതി പ്രകാരം ഡിപ്പോയുടെ കളക്ഷനിൽ ഗണ്യമായ വർദ്ധനയുണ്ടായി.യൂണിറ്റ് ബഡ്ജറ്റ് ടൂറിസം വിഭാഗത്തിന്റെ കോ - ഓർഡിനേറ്റർ കണ്ടക്ടർ എൻ.കെ. രഞ്ജിത്ത്, ടൂറിസം സെല്ലിന്റെ ചെയർമാനായ ക്ലസ്റ്റർ ഓഫീസർ ഉദയകുമാർ,കൺവീനർ ജനറൽ കൺട്രോളിംഗ് ഇൻസ്പെക്ടർ ടി.ഐ.സതീഷ് കുമാർ എന്നിവരുടെ മേൽനോട്ടത്തിൽ എസ്.ജി.രാജേഷ്, കെ.എസ്. ജയശങ്കർ, ജി. ജിജോ,വി.കെ.സജീവ്, എം.എസ്.സജികുമാർ, സി.രാജൻ, വി. അജയകുമാരൻ തമ്പി, ഗോപകുമാർ എന്നിവരാണ് യാത്രകൾക്ക് നേതൃത്വം നൽകുന്നത്.ഓരോ മാസത്തെയും ടൂറിസം യാത്രാകലണ്ടർ ഡിപ്പോയിൽ നിന്ന് പുറത്തിറക്കുന്നുണ്ട്. നൂറാമത്തെ യാത്ര 24ന് കുമരകത്തേക്കുള്ള ക്രിസ്മസ് സ്പെഷ്യൽ ട്രിപ്പാണ്. പുതുവത്സരാഘോഷങ്ങളുടെ ഭാഗമായി വയനാട്,മൂന്നാർ, വാഗമൺ,പൊന്മുടി എന്നിവിടങ്ങളിലും നെയ്യാറ്റിൻകര ബഡ്ജറ്റ് ടൂറിസം വിഭാഗം യാത്രകൾ സംഘടിപ്പിച്ചിട്ടുണ്ട്. മാതൃകാപരമായ പ്രവർത്തനം കാഴ്ചവച്ച നെയ്യാറ്റിൻകര കെ.എസ്.ആർ.ടി.സി. ബഡ്ജറ്റ് ടൂറിസം വിഭാഗത്തിനെ കെ.ആൻസലൻ എം.എൽ.എ,നഗരസഭ ചെയർമാൻ പി.കെ.രാജമോഹൻ,കെ.എസ്.ആർ.ടി.സി. എം.ഡി.ബിജു പ്രഭാകർ എന്നിവർ അഭിനന്ദിച്ചു. 9846067232 ആണ് എൻക്വയറി നമ്പർ.