തിരുവനന്തപുരം: വ്യവസായ സംരംഭകർക്ക് അവരുടെ സംരംഭങ്ങളുമായി ബന്ധപ്പെട്ട സംശയങ്ങളും പരാതികളും അധികൃതരെ അറിയിക്കുവാനുള്ള സൗകര്യമൊരുക്കി വ്യവസായ വാണിജ്യ വകുപ്പ്. 'ചാറ്റ് വിത്ത് മിനിസ്റ്റർ' എന്ന് പേരിട്ടിരിക്കുന്ന സംവിധാനത്തിന്റെ ഉദ്ഘാടനം വ്യവസായ മന്ത്രി പി.രാജീവ് നിർവഹിച്ചു. സംരംഭകർക്ക് അവരുടെ പരാതികളും അന്വേഷണങ്ങളും 9846441445 എന്ന വാട്സാപ്പ് കോൺടാക്റ്റ് നമ്പറിലേയ്ക്ക് സന്ദേശമായി അയക്കാവുന്നതാണ്. പരാതികൾ പരിഹരിക്കുന്നതിനും ഇതു സംബന്ധിച്ച് സംരംഭകർക്ക് ഉചിതമായ മറുപടി നൽകുന്നതിനും പരമാവധി 7 ദിവസത്തെ സമയ പരിധിയാണ് നിശ്ചയിച്ചിരിക്കുന്നത്. ഒരു വർഷം കൊണ്ട് ഈ സമയപരിധി 48 മണിക്കൂർ ആക്കാനാണ് വ്യവസായ വകുപ്പ് പരിശ്രമിക്കുന്നത്. എല്ലാ പ്രവൃത്തി ദിനങ്ങളിലും രാവിലെ 10 മണി മുതൽ വൈകുന്നേരം 5 മണി വരെ ഈ നമ്പറിലേയ്ക്ക് സന്ദേശം അയക്കാമെന്നും മന്ത്രി പറഞ്ഞു.