പാലോട്: 13 വർഷം മുൻപ് 60 കോടി രൂപ ചെലവിൽ ആരംഭിച്ച നന്ദിയോട്,ആനാട് കുടിവെള്ള പദ്ധതിയുടെ ഭൂരിഭാഗവും പൂർത്തിയായിട്ടും ടാങ്ക് നിർമ്മാണം വൈകുന്നു.ഇത് നന്ദിയോട് ഗ്രാമപഞ്ചായത്തിലെ കുടുംബങ്ങളുടെ കുടിനീരെന്ന സ്വപ്നമില്ലാതാക്കുകയാണ്. പദ്ധതി കൊണ്ട് ഏറെ പ്രയോജമുള്ള മൂന്നു സ്ഥലങ്ങൾ നന്ദിയോട് പഞ്ചായത്തിലും രണ്ട് സ്ഥലങ്ങൾ ആനാട് ഗ്രാമപഞ്ചായത്തിലുമാണ്.
കേന്ദ്ര സംസ്ഥാന സർക്കാരുകളുടെ സാമ്പത്തിക സഹായത്തോടെയാണ് പദ്ധതിയുടെ നടത്തിപ്പ്.പദ്ധതി പൂർത്തീകരിക്കുകയാണെങ്കിൽ നഗരത്തിലേതുപോലെ ശുദ്ധമായ കുടിവെള്ളം ഗ്രാമപ്രദേശങ്ങളിലും എത്തിക്കാനാകും. എന്നാൽ 64 കിലോമീറ്റർ പൈപ്പ് ലൈൻ ഇടേണ്ടതുണ്ട്. ഏറക്കുറെ പൂർത്തിയായിട്ടുണ്ടെങ്കിലും കുടിവെള്ളക്ഷാമം രൂക്ഷമായ പ്രദേശങ്ങളിൽ ഇതുവരെ പൈപ്പ്‌ലൈൻ എത്തിയിട്ടില്ലെന്നാണ് പരാതി.നിലവിൽ പൈപ്പ് ലൈൻ എത്തിയവർക്ക് വെള്ളം ഇല്ലെങ്കിലും ബില്ലും,കാറ്റും യഥേഷ്ടം ലഭിക്കുന്നുണ്ട്.
നന്ദിയോട് കുടിവെള്ള പ്ലാന്റിലെ ഓവർഹെഡ് ടാങ്കുകളുടെ നിർമ്മാണം നിശ്ചലമായി. വേനൽക്കാലത്തിന്റെ തുടക്കത്തിൽത്തന്നെ ഒട്ടുമിക്ക പ്രദേശങ്ങളിലും കുടിവെള്ളക്ഷാമം രൂക്ഷമാണ്. ജലമിഷൻ പദ്ധതി പ്രവർത്തനങ്ങൾക്കിടെ കുടിവെള്ള പൈപ്പുകൾ പലയിടത്തും പൊട്ടിയതും ജലവിതരണത്തെ ബാധിച്ചിട്ടുണ്ട്.
നിരവധിപേരുടെ കുടിവെള്ള സ്രോതസായ വാമനപുരം നദിയിൽ പ്ലാസ്റ്റിക്കും അറവ് മാലിന്യങ്ങളും ഉൾപ്പടെയുള്ളവ കുമിഞ്ഞുകൂടാൻ തുടങ്ങി. ഇതോടെ നദിയിലെ കുടിവെള്ളപദ്ധതി പ്രദേശമായ പാലോട്,ചെറ്റച്ചൽ,താവയ്ക്കൽ,കുണ്ടാളംകുഴി എന്നിവിടങ്ങളിലേക്ക് ജലമെത്തിക്കുന്ന വാമനപുരം നദിയാണ് നാളുകൾ കഴിയും തോറും മാലിന്യവാഹിയായിക്കൊണ്ടിരിക്കുന്നത്. വാമനപുരം നദിയിൽ നിന്നും ശേഖരിക്കുന്ന വെള്ളമാണ് ഉപഭോക്താക്കൾക്ക് വാട്ടർ അതോറിട്ടി നല്കുന്നത്.
കുടിവെള്ള പദ്ധതി ഇതുവരെ
സ്റ്റോറേജ് പ്ലാന്റ്,എയർ ക്ലാരിയേറ്റർ,രണ്ട് ഫ്ളാഷ്‌മിക്സർ,ക്ലാരിഫയർ ഫോക്കുലേറ്റർ എന്നിവയുടെ നിർമ്മാണം പൂർത്തിയായി
കുടിവെള്ളമെത്തിക്കുന്നതിനായി പാലോട് പുതിയ പമ്പ്‌ഹൗസും നിർമ്മിച്ചു. ട്രാൻസ്ഫോർമർ സ്ഥാപിക്കുന്ന നടപടി ആരംഭിച്ചു
ട്രീറ്റ്മെന്റ് പ്ലാന്റ് നിർമ്മാണം ആരംഭിച്ചു. എങ്കിലും നിലവിൽ നിശ്ചലാവസ്ഥയിലാണ്
പ്രധാന തടസം
ആനക്കുഴി,വലിയ താന്നിമൂട്,ആലുങ്കുഴി,ചുള്ളിമാനൂർ,കൈതക്കാട് എന്നീ സ്ഥലങ്ങളിൽ സ്ഥാപിക്കേണ്ട ഓവർ ഹെഡ് ടാങ്കുകളുടെ നിർമ്മാണം പൂർത്തിയാകാത്തതാണ് പ്രധാന തടസം. ഓവർഹെഡ് ടാങ്കുകളുടെ നിർമ്മാണത്തിനായി ആലുങ്കുഴിയിലും താന്നിമൂട്ടും ആനക്കുഴിയിലും വാട്ടർ അതോറിട്ടിക്ക് നന്ദിയോട് പഞ്ചായത്ത് സ്ഥലം വാങ്ങി നല്കിയിട്ടുണ്ട്.
ആനക്കുഴിയിൽ ഓവർഹെഡ് ടാങ്ക് നിർമ്മാണം തുടങ്ങിയെങ്കിലും ഇപ്പോൾ നിശ്ചലമാണ്. ആലുങ്കുഴിയിൽ നിർമ്മാണ ടെൻഡർ നടപടി പൂർത്തിയായി, നിർമ്മാണം തുടങ്ങിയിട്ടില്ല. മറ്റു സ്ഥലങ്ങളിൽ നിലവിൽ ഒരു പ്രവർത്തനവും നടക്കുന്നില്ല.
പദ്ധതി ആരംഭിച്ചത്- 2009ൽ
അനുവദിച്ച തുക- 60കോടി