കഴക്കൂട്ടം/ആറ്റിങ്ങൽ: ക്രിസ്മസ് ആഘോഷത്തിനിടെ കടലിൽ കുളിക്കാൻ ഇറങ്ങിയ നാലുപേരിൽ രണ്ടുപേർ മുങ്ങിമരിച്ചു. രണ്ടുപേരെ കാണാതായി. ഒഴുക്കിൽപ്പെട്ട ഒരാളെ രക്ഷപ്പെടുത്തി. തുമ്പ ആറാട്ട് വഴി സ്വദേശി ഫ്രാങ്കോ ബെയ്സിൽ (38), അഞ്ചുതെങ്ങ് മാമ്പള്ളി സ്വദേശി സജൻ ആന്റണി (34) എന്നിവരുടെ മൃതദേഹങ്ങളാണ് കണ്ടെത്തിയത്.

ഞായറാഴ്ച ഉച്ചയ്ക്ക് തുമ്പ കടലിൽ കുളിക്കാനിറങ്ങവേയാണ് ശക്തമായ തിരയിൽ ഫ്രാങ്കോയെ കാണാതായത്. നിലവിളി കേട്ടെത്തിയ മത്സ്യത്തൊഴിലാളികൾ ഫ്രാങ്കോയെ രക്ഷപ്പെടുത്തി ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.അഞ്ചുതെങ്ങ് മാമ്പള്ളിയിൽ കടലിൽ കാണാതായ അഞ്ചുതെങ്ങ് മാമ്പള്ളി ഓലുവിളാകത്ത് വീട്ടിൽ സജൻ ആന്റണിയുടെ (35) മൃതദേഹം വെട്ടൂർ റാത്തിക്കൽ നിന്ന് ഇന്നലെ വൈകിട്ട് 5.30 ഓടെയാണ് കണ്ടെത്തിയത്.

പുത്തൻതോപ്പ് കടലിൽ കാണാതായ പുത്തൻതോപ്പ് ചിറ്റാറ്റുമുക്കിൽ ഷൈൻ നിവാസിൽ ശ്രേയസ് (16), കണിയാപുരം മസ്താൻ മുക്കിൽ അബ്ദുൽ സലാം - സബീന ദമ്പതികളുടെ മകൻ സാജിദ് (19) എന്നിവരെ ഇതുവരെ കണ്ടെത്താനായിട്ടില്ല. കടലിൽ മുങ്ങിപ്പോയ സാജിദിനെ രക്ഷപ്പെടുത്താൻ ശ്രമിക്കുന്നതിനിടെയാണ് ശ്രേയസ് അപകടത്തിൽപ്പെട്ടത്. കാണാതായ സാജിദ് പ്ളസ്ടു കഴിഞ്ഞ് കഴക്കൂട്ടത്തെ സ്വകാര്യ സ്ഥാപനത്തിൽ ജോലി ചെയ്യുകയായിരുന്നു. ശ്രേയസ് കുളത്തൂർ ഹയർ സെക്കൻഡറി സ്കൂളിലെ പ്ളസ്‌വൺ വിദ്യാർത്ഥിയാണ്. അപകടവാർത്ത അറിഞ്ഞ് ശ്രേയസിന്റെ പിതാവ് ബിനു വിദേശത്തു നിന്ന് നാട്ടിലെത്തി.

കാണാതായവർക്കുള്ള തെരച്ചിൽ പുരോഗമിക്കുകയാണ്. ഞായറാഴ്ച തന്നെ കോസ്റ്റൽ പൊലീസും മത്സ്യത്തൊഴിലാളികളും തെരച്ചിൽ നടത്തിയെങ്കിലും ഇവരെ കണ്ടെത്താനായില്ല. ഇന്നും തെരച്ചിൽ തുടരും.പുത്തൻതോപ്പിൽ ഒഴുക്കിൽപ്പെട്ട് കടലിൽ മുങ്ങിയ മറ്റൊരാളെ രക്ഷപ്പെടുത്തിയത് മത്സ്യത്തൊഴിലാളികളും നാട്ടുകാരും ചേർന്നാണ്. മുതലപ്പൊഴിയിൽ കടലിൽ ഇറങ്ങിയ സ്ത്രീ ഒഴുക്കിൽപ്പെട്ടു. എന്നാൽ സ്ഥലത്തുണ്ടായിരുന്ന കോസ്റ്റൽ വാർഡൻമാർ അവരെ രക്ഷപ്പെടുത്തി കരയ്ക്കെത്തിച്ചു. വലിയ തിരമാലകളും ശക്തമായ അടിയൊഴുക്കുമാണ് അപകടകാരണമായി മത്സ്യത്തൊഴിലാളികൾ പറയുന്നത്. കടൽ പ്രക്ഷുബ്ധമായതിനെ തുടർന്ന് കടലിൽ ഇറങ്ങരുതെന്ന് നേരത്തേതന്നെ പൊലീസ് അറിയിച്ചിരുന്നെങ്കിലും വിലക്കുകൾ ലംഘിച്ചായിരുന്നു പലരും കുളിക്കാൻ ഇറങ്ങിയത്. ഇതാണ് അപകടത്തിന്റെ വ്യാപ്തി വർദ്ധിപ്പിച്ചത്. ഫ്രാങ്കോയുടെ മൃതദേഹം ഇന്ന് തുമ്പ ഇടവകയിൽ സംസ്കരിക്കും. ഭാര്യ:മിൻസി ഫ്രാങ്കോ. മക്കൾ: ഫിയ,​ ഇസ്രാ.സജന്റെ മൃതദേഹം ചിറയിൻകീഴ് മോർച്ചറിയിലേക്ക് മാറ്റി.പോസ്റ്റ്മോർട്ടത്തിന് ശേഷം ഇന്ന് സംസ്കരിക്കും.ആന്റണി - ഗേളി ദമ്പതികളുടെ മകനാണ് സജൻ ആന്റണി. ഭാര്യ: ജോബി.