വിഴിഞ്ഞം: ഫേസ് ബുക്ക് വഴി പരിചയപ്പെട്ട പെൺസുഹൃത്തിനെ കാണാനെത്തി ദുരൂഹ സാഹചര്യത്തിൽ ആഴിമല കടലിൽ വീണ് യുവാവ് മരി​ച്ചത് ആത്മഹത്യയെന്ന് സ്ഥിരീകരിച്ചിട്ടില്ലെന്ന് വിഴിഞ്ഞം പൊലീസ്. ജൂലായ് 9ന് നടന്ന സംഭവത്തിൽ പള്ളിച്ചൽ മൊട്ടമൂട് വള്ളോട്ടുകോണം മേക്കുംകര പുത്തൻവീട്ടിൽ മധു-മിനി ദമ്പതികളുടെ മകൻ കിരൺ (ചിക്കു-25) ആണ് മരിച്ചത്. കിരണിന്റേത് ആത്മഹത്യയെന്ന് ഉറപ്പായിട്ടില്ലെന്ന് വിഴിഞ്ഞം എസ്.എച്ച്.ഒ പ്രജീഷ് ശശി പറഞ്ഞു. ജൂലായ് 13ന് തമിഴ്നാട്ടിലെ കുളച്ചൽ ഇരയിമ്മൻതുറ കടൽത്തീരത്താണ് മൃതദേഹം അടിഞ്ഞത്. അവിടെനിന്ന് പോസ്റ്റ്മോർട്ടം സർട്ടിഫിക്കറ്റ്, ലാബ് പരിശോധനാഫലം എന്നിവ കിട്ടാനുണ്ട്. പ്രാഥമിക റിപ്പോർട്ടിൽ ശ്വാസകോശത്തി​ൽ വെള്ളം നി​റഞ്ഞാണ് മരണം എന്നു കണ്ടെത്തിയിരുന്നു. പെൺകുട്ടിയെ കാണാനായി കിരണും സുഹൃത്തുക്കളും ആഴിമലയിൽ എത്തിയപ്പോൾ പെൺകുട്ടിയുടെ ബന്ധുക്കൾ കിരണിനെ തട്ടിക്കൊണ്ടുപോയി മർദ്ദിച്ചെന്നും പിന്നീട് കാണാതായെന്നും ഒപ്പമുണ്ടായിരുന്ന സുഹൃത്തുക്കൾ പൊലീസിന് മൊഴി നൽകിയിരുന്നു. മകനെ അപായപ്പെടുത്തിയതാണെന്ന് പിതാവ് മധു പരാതി​ നൽകിയതി​നെ തുടർന്ന് 3 പേരെ പൊലീസ് അറസ്റ്റ് ചെയ്തിരുന്നു.