പാറശാല: ദേശീയ പാതയിൽ ഇഞ്ചിവിള ചാനൽ ക്രോസിന് സമീപം ബസും ലോറിയും കൂട്ടിയിടിച്ച് രണ്ട് പേർക്ക് ഗുരുതര പരിക്ക്.പരിക്കേറ്റ ലോറി ഡ്രൈവർ മധുര കാരുപ്പട്ടി സ്വദേശി മുരുകൻ(40),ക്ളീനർ രമേശ് (27) എന്നിവരെ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.പനച്ചമൂട്ടിൽ നിന്ന് മധുരയിലേക്ക് പോകുകയായിരുന്ന തമിഴ്‌നാട് ട്രാൻസ്പോർട്ട് കോർപ്പറേഷന്റെ ബസും മധുരയിൽ നിന്ന് തിരുവനന്തപുരം ചാലയിലേക്ക് പഴങ്ങളുമായി വരികയായിരുന്ന ലോറിയുമാണ് കൂട്ടിയിടിച്ചത്. ഇന്നലെ രാവിലെ 6നാണ് സംഭവം. ബസ് യാത്രക്കാരിൽ നിസാര പരിക്കേറ്റ നാലുപേരെ പാറശാല താലൂക്ക് ആശുപത്രിയിൽ പ്രവേശിപ്പിച്ചു.അപകടത്തിൽ ലോറിയുടെ മുൻ വശം പൂർണമായും തകർന്നു.ഡ്രൈവർ ഉറങ്ങിയതാകാം അപകടകാരണമെന്നാണ് ദൃക്സാക്ഷികൾ പറയുന്നത്. അപകടങ്ങൾ പതിവുള്ള ഇവിടെ ദിവസങ്ങൾക്ക് മുൻപ് ബൈക്ക് ടെമ്പോവാനിലിടിച്ച് ബൈക്ക് യാത്രികൻ മരണപ്പെട്ടിരുന്നു.