തിരുവനന്തപുരം: ക്രിസ്മസ് ആഘോഷങ്ങൾക്കിടെ ലീഗൽ മെട്രോളജി വകുപ്പ് വ്യാപാര സ്ഥാപനങ്ങളിൽ നടത്തിയ പരിശോധനയിൽ ക്രമക്കേടുകൾ കണ്ടെത്തിയതിനെ തുടർന്ന് 12,05,500 രൂപ പിഴയീടാക്കി. 569 സ്ഥാപനങ്ങൾക്കെതിരെ കേസെടുത്തു. സംസ്ഥാനമൊട്ടാകെ 19 മുതൽ 24 വരെ 2455 സ്ഥാപനങ്ങളിലാണ് പരിശോധന നടത്തിയത്. വിപണിയിലെ അളവ്/ തൂക്ക ലംഘനങ്ങൾ തടയുന്നതിനും ഉപഭോക്തൃ സംരക്ഷണം ഉറപ്പ് വരുത്തുന്നതിനുമായാണ് മിന്നൽ പരിശോധന നടത്തിയത്. അളവ് തൂക്ക ഉപകരണം മുദ്ര പതിപ്പിക്കാത്തത്/ രേഖ ഹാജരാക്കാത്തത്, അമിത വിലയീടാക്കൽ, വില തിരുത്തൽ, പാക്കർ രജിസ്‌ട്രേഷൻ ഇല്ലാത്തത്, അളവിൽ/ തൂക്കത്തിൽ കുറവ് തുടങ്ങിയവ പരിശോധനയിൽ കണ്ടെത്തി.