നെടുമങ്ങാട്:മരം മുറിയ്ക്കുന്നതിനിടെ സമീപത്ത് കേടായിനിന്ന മരം കടപുഴകി വീണ് തൊഴിലാളി മരിച്ചു.പോത്തൻകോട് നന്നാട്ട്കാവ് സ്വദേശി ചന്ദ്രൻ നായർ (55)ആണ് മരിച്ചത്.നെടുമങ്ങാട് ചുള്ളിമാനൂർ ഫോറസ്റ്റ് റെയ്ഞ്ച് ഫ്‌ളൈയിംഗ് സ്ക്വാഡ് ഓഫീസ് പരിസരത്താണ് അപകടം .ഫോറസ്റ്റ് ഓഫീസിന് കെട്ടിടം നിർമ്മിക്കാൻ അവിടെയുള്ള മരങ്ങൾ മുറിച്ച് മാറ്റാൻ കരാർ നൽകിയിരുന്നു. പോത്തൻകോട് സ്വദേശിയായ ഷാജിയാണ് കരാർ ഏറ്റെടുത്തത്.മരം മുറിച്ച് മാറ്റുന്നതിന് രാവിലെ തന്നെ ഷാജിയും 5 തൊഴിലാളികളും എത്തി.തുടർന്ന് കരാർ പ്രകാരം ഉള്ള മരം മുറിച്ചപ്പോൾ അതിന്റെ ചില്ലകൾ കേടായ മരത്തിൽ വീഴുകയും മരം കടപുഴകി ചന്ദ്രൻ നായരുടെ ദേഹത്ത് വീഴുകയുമായിരുന്നു.മരം വീഴുന്നതുകണ്ട് മറ്റ് തൊഴിലാളികൾ ഓടി മാറിയത് കൂടുതൽ അപകടം ഒഴിവാക്കി. ചന്ദ്രന് ഓടി മാറാൻ കഴിഞ്ഞില്ല.മരക്കൊമ്പ് ചന്ദ്രന്റെ ദേഹത്ത് കൂടി വീഴുകയായിരുന്നു. നെടുമങ്ങാട് ജില്ലാ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല .ഭാര്യ:ശ്രീകുമാരി.മക്കൾ:വിഷ്ണു ചന്ദ്രൻ,വൈഷ്ണവി.മരുമകൻ:ഹരി

ഫോട്ടോ : ചന്ദ്രൻ നായർ