ചിറയിൻകീഴ്: ശ്രീനാരായണ ഗുരുദേവൻ പ്രതിഷ്ഠാകർമ്മം നിർവഹിച്ച കുളത്തൂർ കോലത്തുകര ശിവക്ഷേത്രസന്നിധിയിൽ നിന്ന് ശിവഗിരിയിലേക്ക് പുറപ്പെട്ട മതസമന്വയ തീർത്ഥാടന പദയാത്രയ്ക്ക് പെരുങ്ങുഴി മുസ്ലിം ജമാഅത്ത് അങ്കണത്തിൽ സ്നേഹോഷ്മള വരവേൽപ്പ് നൽകി. മതാതീത മാനവികത സമൂഹത്തിന് മുമ്പാകെ മഹദ് സന്ദേശങ്ങളിലൂടെ പകർന്നുനൽകിയ മഹാഗുരുവിന്റെ മണ്ണിലേക്കുള്ള തീർത്ഥയാത്രയ്ക്ക് മതത്തിന്റെ അതിരുകൾ ഭേദിച്ച് ജമാഅത്ത് ഭാരവാഹികൾ നൽകിയ സ്വീകരണം മതസൗഹാർദ്ദത്തിന്റെ സുന്ദര മുഹൂർത്തമായി. ഗുരുദേവ വിഗ്രഹവും വഹിച്ച് രഥഘോഷയാത്രയായെത്തിയ 500ൽപ്പരം പീതവസ്ത്രധാരികളായ ഗുരുവിശ്വാസികളെ ജമാഅത്ത് പ്രസിഡന്റ് ഇ.അബ്ദുൽ അസീസ്,സെക്രട്ടറി എ.അബ്ദുൽ ഹക്കീം എന്നിവർ ജമാഅത്ത് കവാടത്തിൽ പദയാത്ര ക്യാപ്ടൻ പീത ഷാൾ അണിയിച്ച് സ്വാഗതം ചെയ്തു. വൈസ് പ്രസിഡന്റ് യു.അഷ്റഫ് ,ജോയിന്റ് സെക്രട്ടറിമാരായ എ.എസ്.സുഹൈൽ, ഇ.ഷാജഹാൻ, ട്രഷറർ എം.നസീർ, ഭരണസമിതി അംഗങ്ങളായ എസ്.റാമി, എ.സമീർ, എ.ഷാഫി, എം.എ.ഹുസൈൻ, എച്ച്.ഹസീം മുഹമ്മദ് എന്നിവരുടെ സംഘം പദയാത്ര സംഘത്തിന് ലഘുഭക്ഷണവും ശീതളപാനീയങ്ങളും നൽകി എതിരേറ്റു. എസ്.എൻ.ഡി.പി യോഗം ചിറയിൻകീഴ് യൂണിയൻ വൈസ് പ്രസിഡന്റ് പ്രദീപ് സഭവിള, സെക്രട്ടറി ശ്രീകുമാർ പെരുങ്ങുഴി, യോഗം ഡയറക്ടർ അഴൂർ ബിജു, കൗൺസിലർ സി.കൃത്തിദാസ്, ഗുരുക്ഷേത്രസമിതി ജില്ലാ പ്രസിഡന്റ് ബൈജു തോന്നയ്ക്കൽ, എസ്.എൻ ട്രസ്റ്റ് ബോർഡ് അംഗങ്ങളായ കെ.രഘുനാഥൻ, കെ.പുഷ്കരൻ, എസ്.എൻ.ഡി.പി ശാഖാ യോഗം ഭാരവാഹികളായ സന്തോഷ് നാലുമുക്ക്, ജി.സാംബശിവൻ, എൻ.അജിത്ത്, ഗുരുക്ഷേത്ര സെക്രട്ടറി ആർ.ഷിബു, ട്രഷറർ ഷിജോസ് ബാബു തുടങ്ങിയവരും സ്വീകരണ ചടങ്ങിൽ പങ്കെടുത്തു. കുളത്തൂരിൽ നിന്നുള്ള മാനവമൈത്രി പദയാത്രയ്ക്ക് ചിറയിൻകീഴിൽ ഇടഞ്ഞുംമൂല, പെരുങ്ങുഴി, കാറ്റാടിമുക്ക് ജംഗ്ഷൻ, അഴൂർ, മഞ്ചാടിമൂട്, കടകം എന്നിവിടങ്ങളിൽ എസ്.എൻ.ഡി.പി ശാഖായോഗങ്ങൾ, ഗുരുമന്ദിരങ്ങൾ എന്നിവയുടെ നേതൃത്വത്തിൽ ഭക്തിനിർഭരമായ സ്വീകരണങ്ങൾ നൽകി. ചിറയിൻകീഴ് ശാർക്കര ഗുരുക്ഷേത്ര സന്നിധിയിലെത്തിയ പദയാത്ര സംഘത്തെ ചിറയിൻകീഴ് യൂണിയൻ പ്രസിഡന്റ് സി.വിഷ്ണുഭക്തൻ,ഗുരുക്ഷേത്രസമിതി പ്രസിഡന്റ് ഡോ.ബി.സീരപാണി എന്നിവർ ചേർന്ന് ഹാരാർപ്പണം നടത്തി സ്വീകരിച്ചു. തുടർന്ന് ശിവഗിരി തീർത്ഥാടന ചിറയിൻകീഴ് പഞ്ചായത്ത് കമ്മിറ്റിയുടെ നേതൃത്വത്തിൽ പദയാത്രികർക്ക് ശാർക്കരയിൽ സമൂഹസദ്യയും നൽകി.