കൽപ്പറ്റ: ജില്ലയിലെ ക്രിസ്‌മസ്- പുതുവത്സര വിപണിയിൽ പരിശോധന കർശനമാക്കാൻ ഭക്ഷ്യ സുരക്ഷാ വകുപ്പ്. ഭക്ഷ്യോത്പാദന- വിതരണ സ്ഥാപനങ്ങൾക്ക് ഭക്ഷ്യസുരക്ഷാ ലൈസൻസ് /രജിസ്‌ട്രേഷൻ നിർബന്ധമാക്കി. നിയമം ലംഘിക്കുന്നവർക്കെതിരെ കർശനമായ നടപടികൾ സ്വീകരിക്കാനാണ് തീരുമാനം.വീടുകൾ കേന്ദ്രീകരിച്ച് കേക്ക് നിർമ്മിച്ച് വിൽപ്പന നടത്തുന്നവർക്കും ഭക്ഷ്യ സുരക്ഷാ ലൈസൻസ് /രജിസ്‌ട്രേഷൻ നിർബന്ധമാക്കിയിട്ടുണ്ട്. കൊവിഡ് -19 / ഭക്ഷ്യ സുരക്ഷാ മാനദണ്ഡങ്ങൾ കർശനമായും പാലിക്കണമെന്ന് നിർദ്ദേശം നൽകി. ഉപഭോക്താക്കൾ തുറന്ന് വെച്ചതോ ഈച്ച, പാറ്റ, പൊടി മുതലായവ മലിനപ്പെടുത്തിയതോ, വൃത്തിഹീനമായ സാഹചര്യത്തിൽ പാകം ചെയ്യുന്നതോ, വിതരണം ചെയ്യുന്നതോ ആയ ആഹാര സാധനങ്ങൾ ഉപയോഗിക്കരുതെന്നും തിളപ്പിച്ചാറിയ ശുദ്ധജലം മാത്രം ഉപയോഗിക്കണമെന്നും മുന്നറിയിപ്പ് നൽകിയിട്ടുണ്ട്.

ഭക്ഷ്യ സുരക്ഷാ നിർദ്ദേശങ്ങൾ

ഭക്ഷ്യ വസ്തുക്കളുടെ നിർമാണം, വിതരണം എന്നിവയിൽ വൃത്തി ശുചിത്വ ശീലങ്ങൾ പാലിക്കണം.

* ഭക്ഷ്യ സുരക്ഷാ ലൈസൻസ്/ രജിസ്‌ട്രേഷൻ സർട്ടിഫിക്കറ്റുകൾ സ്ഥാപനത്തിൽ പ്രദർശിപ്പിക്കണം.

* മുറിച്ചുവെച്ച് വിതരണം ചെയ്യുന്ന പഴങ്ങൾ, തുറന്നുവെച്ച് വിൽപ്പന നടത്തുന്ന ബേക്കറി അടക്കമുളള ഭക്ഷ്യോത്പ്പന്നങ്ങൾ ഈച്ച, പൊടി മുതലായവ മലിനപ്പെടുത്തുന്ന സാഹചര്യം ഒഴിവാക്കണം.

* പായ്ക്കറ്റ് ഭക്ഷണത്തിന്റെ പുറത്ത് കർശനമായ ലേബൽ വ്യവസ്ഥകൾ പാലിക്കണം.

* സർബത്ത്, ജ്യൂസ്, ചായ, കാപ്പി മുതലായ പാനീയങ്ങൾക്ക് ഉപയോഗിക്കുന്ന വെളളവും, ഐസും ശുദ്ധമായ കുടിവെളളത്തിൽ ഉണ്ടാക്കിയവ ആയിരിക്കണം.

* ജീവനക്കാർ കർശനമായ വൃത്തി ശുചിത്വ ശീലങ്ങളും കൊവിഡ് 19 നിർദ്ദേശങ്ങളും പാലിക്കണം.

* എണ്ണപ്പലഹാരങ്ങളും മറ്റും പാകം ചെയ്യാൻ ഉപയോഗിക്കുന്ന എണ്ണ വീണ്ടും വീണ്ടും ചൂടാക്കി ഉപയോഗിക്കരുത്.

* പ്രിന്റഡ് ന്യൂസ് പേപ്പറിൽ ഭക്ഷ്യ വസ്തുക്കൾ പൊതിഞ്ഞ് കൊടുക്കരുത്.

* കുപ്പി വെളളവും മറ്റ് പാനീയങ്ങളും വെയിൽ തട്ടുന്ന രീതിയിൽ സൂക്ഷിക്കാൻ പാടില്ല.

പരാതികൾ അറിയിക്കാം

ഭക്ഷ്യ സുരക്ഷാ അസി. കമ്മിഷണർ 8943346192.
കൽപ്പറ്റ ഭക്ഷ്യ സുരക്ഷാ ഓഫീസർ 9072639570.
സുൽത്താൻ ബത്തേരി/മാനന്തവാടി ഭക്ഷ്യ സുരക്ഷാ ഓഫീസർ 8943346570.
ടോൾ ഫ്രീ നമ്പർ 1800 425 1125.

'ഭക്ഷ്യ സുരക്ഷാ ലൈസൻസ് /രജിസ്‌ട്രേഷൻ എടുക്കാത്ത ഒരുസ്ഥാപനവും ജില്ലയിൽ പ്രവർത്തിക്കാൻ അനുവദിക്കില്ല'. സി.വി.വിജയൻ, ഭക്ഷ്യ സുരക്ഷാ അസി.കമ്മിഷണർ