ആലപ്പുഴ: നവകേരള സദസിനായി മുഖ്യമന്ത്രിയും മന്ത്രിമാരും ജില്ലയിലേക്ക് ജങ്കാറിൽ പ്രവേശിക്കും. 14ന് ഉച്ചക്ക് ശേഷം വൈക്കത്ത് നിന്നും ജങ്കാറിലൂടെ ആലപ്പുഴ ജില്ലയിലെ തവണക്കടവിലേക്കാണ് സംഘം എത്തുന്നത്. ഇതിനു മുന്നോടിയായി ജില്ല കളക്ടർ ജോൺ.വി.സാമുവലിന്റെ നേതൃത്വത്തിൽ സുരക്ഷ പരിശോധനകൾ നടത്തി. മുഖ്യമന്ത്രിയും മന്ത്രിമാരും സഞ്ചരിക്കുന്ന ബസും രണ്ട് സുരക്ഷാ വാഹനങ്ങളുമാണ് ജങ്കാറിലേക്ക് പ്രവേശിക്കുക.

ജങ്കാറിന്റെ സുരക്ഷ, ലോഡിംഗ് കപ്പാസിറ്റി തുടങ്ങിയവ പ്രത്യേകം പരിശോധിച്ചു. ജങ്കാർ ഇറങ്ങിയ ശേഷം അരൂർ മണ്ഡലത്തിലെ വേദിയായ അരയങ്കാവ് ക്ഷേത്ര ഗ്രൗണ്ടിലേക്കാണ് സംഘം പോകുന്നത്. ഇവിടേക്കുള്ള വഴിയും അരൂർ, ചേർത്തല നിയോജക മണ്ഡലങ്ങളിലെ നവകേരള സദസ് നടക്കുന്ന വേദിയും പരിശോധിച്ചു.