കുട്ടനാട്: കഴി​ഞ്ഞ ദി​വസങ്ങളി​ൽ പെയ്ത കനത്തമഴയ്‌ക്കൊപ്പമുണ്ടായ ഇടി​മിന്നലിൽ കെ.എസ്.ഇ.ബി​ ട്രാൻസ്‌ഫോർമറുകൾ നശിച്ചതിനെ തുടർന്ന് കുട്ടനാട്ടി​ലെ കായൽ നിലങ്ങളിലെ പമ്പി​ംഗ് നി​ലച്ചത് പുഞ്ചകൃഷി​യെ പ്രതി​സന്ധി​യി​ലാക്കി​. വി​തയ്ക്കു ശേഷം പാടങ്ങളി​ൽ കയറ്റി​യി​ട്ടുന്ന വെള്ളം പമ്പ് ചെയ്തു കളയാൻ മോട്ടോറുകൾ പ്രവർത്തി​പ്പി​ക്കാൻ കഴി​യാത്ത സ്ഥി​തി​യാണി​പ്പോൾ. ഐ ബ്ലോക്ക്, പഴേ പതിനാലായിരം, ഇ ബ്ലോക്ക് എന്നീ കായലുകളിലെ കൃഷിയാണ് വെള്ളത്തിലായത്.

കെ.എസ്.ഇ.ബി​യുടെ പള്ളം സെക്ഷനാണ് ഈ മേഖലയിലെ വൈദ്യുതി വിതരണത്തി​ന്റെ ചുമതല. കഴിഞ്ഞ ദിവസങ്ങളി​ൽ നശി​ച്ച ട്രാൻസ്‌ഫോർമറിന്റെ അതേ പവറിലുള്ളവ സ്റ്റോക്ക് ഇല്ലാത്തതിനാൽ വൈദ്യുതി​പ്രശ്നം പരിഹരിക്കാൻ ദിവസങ്ങൾ വേണ്ടിവന്നേക്കുമെന്നാണറി​യുന്നത്. ഇത് പാടത്തി​റക്കി​യ വിത്ത് വെള്ളത്തിൽ കിടന്ന് നശിക്കുന്നതിനിടയാക്കും. വീണ്ടും വിതയ്‌ക്കേണ്ടി വന്നാൽ അത് പുഞ്ചകൃഷിയുടെ താളം അപ്പാടെ തെറ്റുന്നതിന് കാരണമാകും. വൈദ്യുതി തകരാർ പരിഹരിക്കുന്നതിന് അടിയന്തര നടപടി സ്വീകരിക്കണമെന്നാണ് കർഷകരുടെ ആവശ്യം.