ഹരിപ്പാട്: പെട്ടിവണ്ടിയിൽ കാർ ഇടിച്ചുകയറി രണ്ടുപേർക്ക് പരിക്ക്. കച്ചവടക്കാരനായ മുട്ടം മുല്ലശേരിൽ ഷഹനാസ്(34), സാധനം വാങ്ങാനെത്തിയ മുട്ടം ബിസ്മില്ല മൻസിലിൽ താജുദ്ദീൻ(50) എന്നിവർക്കാണ് പരിക്കേറ്റത്. ഇന്നലെ ഉച്ചയ്ക്ക് രണ്ടുമണിയോടെ തട്ടാരമ്പലം - നങ്ങ്യാർകുളങ്ങര റോഡിൽ മുട്ടം മൈത്രി ജംഗ്ഷന് സമീപമായിരുന്നു അപകടം. പെട്ടിവണ്ടിയിൽ നിന്ന് ഷഹനാസ് പഴങ്ങൾ എടുത്ത് കൊടുക്കുന്നതിനിടെ തട്ടാരമ്പലം ഭാഗത്തുനിന്ന് വന്ന കാർ നിയന്ത്രണംവിട്ട് പെട്ടിവണ്ടിയിലും താജുദ്ദീന്റെ ബൈക്കിലും ഇടിച്ചു കയറുകയായിരുന്നു. ആഘാതത്തിൽ താജുദ്ദീൻ സമീപത്തെ തട്ടിലേക്ക് തെറിച്ചു വീണു. സമീപത്തെ മരത്തിൽ ഇടിച്ചാണ് കാർ നിന്നത്. പരിക്കേറ്റ ഇരുവരെയും തട്ടാരമ്പലത്തിലെ സ്വകാര്യ ആശുപത്രിയിൽ പ്രവേശിപ്പിച്ചു. കരിയിലക്കുളങ്ങര പൊലീസ് കേസ്സെടുത്തു.