പുതിയ ഒപി ബ്ലോക്ക് യാഥാർത്ഥ്യത്തിലേക്ക്

ആലപ്പുഴ: ആലപ്പുഴ ജനറൽ ആശുപത്രിയിൽ നിർമ്മാണം പൂർത്തിയായ പുതിയ ഒ.പി ബ്ലോക്ക് പ്രവർത്തനസജ്ജമാക്കുന്നതിന് ആശുപത്രി ഉപകരണങ്ങൾ വാങ്ങുന്നതിനായി കിഫ്ബി വഴി 16.43 കോടി രൂപ അനുവദിച്ചതായി മന്ത്രി വീണാ ജോർജ് അറിയിച്ചു. 117 കോടി രൂപയുടെ അത്യാധുനിക സംവിധാനങ്ങളാണ് ഒ.പി ബ്ലോക്കിൽ സജ്ജമാക്കി വരുന്നത്. നിലവിലെ കെട്ടിടം വളരെ പഴക്കമുള്ളതായതിനാലാണ് പുതിയ കെട്ടിടം നിർമ്മിച്ചത്. എത്രയും വേഗം പുതിയ കെട്ടിടം പ്രവർത്തനസജ്ജമാക്കുമെന്നും മന്ത്രി വ്യക്തമാക്കി. 1.25 ലക്ഷം ചതുരശ്ര മീറ്റർ വിസ്തീർണമുള്ള അത്യാധുനിക സംവിധാനമുള്ള ഏഴു നില കെട്ടിടമാണ് ഒ.പി ബ്ലോക്ക്. ഗ്രൗണ്ട് ഫ്ലോറിൽ ഒ.പി രജിസ്ട്രേഷൻ, മെഡിസിൻ ഒ.പി, ഒ.പി ഫാർമസി, റേഡിയോളജി വിഭാഗം എന്നിവയുണ്ടാകും. ഒന്നാം നിലയിൽ പീഡിയാട്രിക് ഓർത്തോപീഡിക്സ് ഒ.പി, ഒഫ്ത്താൽമോളജി ഒ.പി, ഫ്ളൂറോസ്‌കോപ്പി, മാമോഗ്രാഫി എന്നിവയും രണ്ടാം നിലയിൽ റെസ്പിറേറ്ററി മെഡിസിൻ ഒ.പി, സർജറി ഒ.പി, ദന്തൽ ഒ.പി, ഇ.എൻ.ടി ഒ.പി എന്നിവയുമാണ്.

മൂന്നാം നിലയിൽ ഡിസ്ട്രിക്ട് ഏർളി ഇന്റർവെൻഷൻ സെന്റർ പ്രവർത്തിക്കും. നാലാം നിലയിൽ യൂറോജി ഒ.പി, ന്യൂറോളജി ഒ.പി, ഗ്യാസ്ട്രോ സർജറി ഒ.പി, ഗ്യാസ്ട്രോ മെഡിസിൻ, ന്യൂറോ സർജറി ഡിപ്പാർട്ട്മെന്റ്, അഞ്ചാം നിലയിൽ ഡെർമറ്റോളജി ഒ.പി, ഓങ്കോളജി ഒ.പി, ഓങ്കോളജി വാർഡ്, ഏഴാം നിലയിൽ അഡ്മിനിസ്ട്രേഷൻ വിഭാഗം, ലബോറട്ടറി എന്നിവയുണ്ടാകും.