കായംകുളം: മകൾ ഒാടിച്ചിരുന്ന സ്കൂട്ടറിന് പിന്നിലിരുന്ന് സഞ്ചരിച്ച മാതാവ് ടാങ്കർ ലോറി കയറി മരിച്ചു. നിസാര പരിക്കുകളോടെ മകൾ രക്ഷപ്പെട്ടു. കായംകുളം പെരുങ്ങാല ദേശത്തിനകം അശ്വതിയിൽ വിശ്വംഭരന്റെ ഭാര്യ മണിയമ്മയാണ് (53) മരിച്ചത്. ഏക മകൾ പാർവ്വതി (23)ക്കാണ് പരിക്കേറ്റത്.

കെ.പി റോഡിൽ കാദീശാ പള്ളിക്ക് മുന്നിൽ ഇന്നലെ ഉച്ചയ്ക്ക് 12 മണിയോടെയായിരുന്നു അപകടം. അമ്മയും മകളും കായംകുളത്ത് ബാങ്കിൽ വന്നശേഷം തിരികെ വീട്ടിലേക്ക് സ്കൂട്ടറിൽ മടങ്ങുമ്പോൾ അടൂരിലേക്ക് പോകുകയായിരുന്ന ടാങ്കർ ലോറി പിന്നിൽ ഇടിക്കുകയായിരുന്നു. ഇടിയുടെ ആഘാതത്തിൽ സ്കൂട്ടർ മറിഞ്ഞ് മണിയമ്മ ലോറിക്കടിയിലേക്ക് വീണു. ഉടൻ തന്നെ പൊലീസ് കായംകുളം താലൂക്ക് ആശുപത്രി എത്തിച്ചെങ്കിലും രക്ഷിക്കാനായില്ല. സംസ്കാരം ഇന്ന് വൈകിട്ട് 3 ന് വീട്ടുവളപ്പിൽ.