കൊച്ചി: പഴയ മോഡൽ ഹോണ്ട യൂണികോൺ ബൈക്ക് നൽകി ഉപഭോക്താവിനെ കബളിപ്പിച്ച ഡീലർ വാഹനവിലയും നഷ്ടപരിഹാരവുമുൾപ്പെടെ 1,05,660 രൂപ നൽകാൻ എറണാകുളം ജില്ലാ ഉപഭോക്തൃ തർക്ക പരിഹാര കോടതി ഉത്തരവിട്ടു. നെടുമ്പാശേരി സ്വദേശി അരവിന്ദ് ജി. ജോൺ നൽകിയ പരാതിയിലാണ് ഡി.ബി. ബിനു അദ്ധ്യക്ഷനും വൈക്കം രാമചന്ദൻ, ടി.എൻ. ശ്രീവിദ്യ എന്നിവർ അംഗങ്ങളുമായ ബഞ്ചിന്റെ വിധി.

2018 ഫെബ്രുവരിയിലാണ് അങ്കമാലി ആര്യഭംഗി മോട്ടോഴ്‌സിൽ പരാതിക്കാരൻ ബൈക്ക് ബുക്ക് ചെയ്തത്. 2018 മാർച്ചിൽ വാഹനം നൽകിയെങ്കിലും ആർ.സി ബുക്കിൽ 2017 മോഡൽ എന്നാണ് രേഖപ്പെടുത്തിയിരുന്നത്. പഴയ വാഹനമാണ് പുതിയ മോഡലെന്ന വ്യാജേന ഡീലർ നൽകിയതെന്നും ഇത് സേവനത്തിലെ ന്യൂനതയാണെന്നും പരാതിയിൽ പറയുന്നു.

പുതിയ മോഡൽ കാണിച്ച് പഴയ മോഡൽ നൽകി ഉപഭോക്താവിനെ കബളിപ്പിച്ചത് അധാർമ്മിക വ്യാപാര രീതിയാണെന്ന് കോടതി വിലയിരുത്തി.

വാഹനത്തിന്റെ വിലയായ 85,660 രൂപ ഡീലർ പരാതിക്കാരന് നൽകുമ്പോൾ പഴയവാഹനം തിരിച്ചുനൽകണം. കൂടാതെ, നഷ്ടപരിഹാരവും കോടതി ചെലവുമായി 20,000 രൂപ ഒൻപത് ശതമാനം പലിശ സഹിതം 30 ദിവസത്തിനകം പരാതിക്കാരന് നൽകണമെന്നും ഉത്തരവിൽ പറയുന്നു.