കൊച്ചി: ട്വന്റി 20 പാർട്ടിയും ആം ആദ്മി പാർട്ടിയും ചേർന്ന് രൂപീകരിച്ച പീപ്പിൾസ് വെൽഫെയർ അലയൻസ് രാഷ്ട്രീയസഖ്യം പിരിച്ചുവിടുന്നു. ഒന്നര വർഷമായിട്ടും ഉദ്ദേശ്യലക്ഷ്യങ്ങൾ കൈവരിക്കാനോ പൊതുമിനിമം പരിപാടി തയ്യാറാക്കാനോ ആശയപരമായി യോജിച്ചു പ്രവർത്തിക്കാനോ കഴിയാത്ത സാഹചര്യത്തിലാണിത്.

2022 മേയ് 15ന് കിഴക്കമ്പലം കിറ്റെക്‌സ് ഗ്രൗണ്ടിൽ നടന്ന സമ്മേളനത്തിലാണ് ട്വന്റി 20 പാർട്ടി പ്രസിഡന്റ് സാബു എം.ജേക്കബും ആം ആദ്മി ദേശീയ കൺവീനറും ഡൽഹി മുഖ്യമന്ത്രിയുമായ അരവിന്ദ് കേജ്‌രിവാളും ചേർന്ന് സഖ്യം പ്രഖ്യാപിച്ചത്.

സഖ്യം രാഷ്ട്രീയമായും സംഘടനാപരമായും ട്വന്റി 20ക്ക് ഗുണകരമാകില്ലന്ന് ബോദ്ധ്യപ്പെട്ടതിനാലാണ് തീരുമാനമെന്ന് സാബു എം.ജേക്കബ് ഇ- മെയിലിലൂടെ കേജ്‌രിവാളിനെ അറിയിച്ചു.

രാഷ്ട്രീയ ഉദ്യോഗസ്ഥലോബികളിൽ നിന്ന് കേരളത്തെ വീണ്ടെടുക്കാനും വികസനസ്വപ്നങ്ങൾ സാക്ഷാത്കരിക്കാനും ട്വന്റി 20 പാർട്ടി പ്രവർത്തിക്കുമെന്ന് സാബു എം.ജേക്കബ് പറഞ്ഞു.