പെരുമ്പാവൂർ: മുഖ്യമന്ത്രിയും മന്ത്രിമാരും സഞ്ചരിക്കുന്ന ബസിനു നേരെ ഷൂസെറിഞ്ഞ കെ.എസ്.യു പ്രവർത്തകർക്കെതി​രെ ജാമ്യം ലഭിക്കാത്ത നരഹത്യാക്കുറ്റം ചുമത്തിയ പൊലീസിന് കോടതിയുടെ രൂക്ഷ വിമർശനം. മന്ത്രി​മാർക്ക് മാത്രം പൊലീസ് സംരക്ഷണം നൽകി​യാൽ പോരെന്നും ജനങ്ങളെക്കൂടി​ സംരക്ഷി​ക്കണമെന്നും ചൂണ്ടി​ക്കാട്ടി​യ കോടതി​ , പ്രതികൾക്ക് ജാമ്യം അനുവദിച്ചു.

പ്രതി​കൾക്കെതി​രെ വധശ്രമക്കേസെടുത്തതി​ൽ പെരുമ്പാവൂർ ജുഡിഷ്യൽ ഫസ്റ്റ് ക്ലാസ് മജിസ്ട്രേട്ട് കോടതി​യുടേതാണ്

വി​മർശനം. പെരുമ്പാവൂരിലെ നവകേരളസദസ് കഴിഞ്ഞ് കോതമംഗലത്തേയ്ക്ക് പോയ ബസിന്റെ മുൻവശത്തെ ഗ്ളാസിന് നേരെ ഓടക്കാലി പെട്രോൾ പമ്പിനു സമീപം വച്ചാണ് ഷൂസെറിഞ്ഞത്. ഷൂസ് ബസിന്റെ ഗ്ളാസിൽ കൊള്ളുക പോലും ചെയ്യാത്ത സാഹചര്യത്തിൽ ജാമ്യം ലഭിക്കാത്ത നരഹത്യയുടെ 308-ാം വകുപ്പ് കെ.എസ്.യു പ്രവർത്തകർക്കെതിരെ ചുമത്തിയത് എങ്ങനെ നിലനിൽക്കുമെന്ന് മജിസ്ട്രേട്ട് സ്മിത സൂസൻ മാത്യു ചോദിച്ചു. ഗ്ളാസിലൂടെ അകത്തേയ്ക്ക് ഷൂ വീഴില്ലല്ലോയെന്നും കോടതി ചോദിച്ചു.

പൊലീസിന്റെ കൃത്യനിർവഹണത്തിന് തടസം സൃഷ്ടിച്ചെന്ന വകുപ്പും പൊതുസ്ഥലത്ത് ബഹളം ഉണ്ടാക്കിയെന്ന വകുപ്പും നരഹത്യക്കുറ്റവുമാണ് കുറുപ്പംപടി പൊലീസ് ചുമത്തിയത്. കെ.എസ്.യു സംസ്ഥാന സെക്രട്ടറിയും പൂത്തോട്ട ലാ കോളേജി​ൽ നിയമ വിദ്യാർത്ഥിയുമായ കെ.സി വർഗീസ്, ഇതേ കോളേജി​ലെ വിദ്യാർത്ഥികളായ ജിബിൻ മാത്യു, ദേവകുമാർ, തൃക്കാക്കര ഭാരതമാത കോളേജ് വിദ്യാർത്ഥികളായ ജെയ്‌സൻ, ജോൺസൻ എന്നിവരെയാണ് പൊലീസ് അറസ്റ്റു ചെയ്തത്.

പ്രതിഷേധിച്ച തങ്ങളെ ഡി.വൈ.എഫ്.ഐ പ്രവർത്തകരും നവകേരള സദസി​ന്റെ സംഘാടകരും മർദ്ദിച്ചതായി പ്രതികൾ കോടതിയെ അറിയിച്ചു. പൊലീസ് അപ്പോൾ അവി​ടെ ഉണ്ടായി​രുന്നി​ല്ലെന്ന് അവർ ധരി​പ്പി​ച്ചു. ഇവർക്ക് നേരെ ആക്രമണമുണ്ടായെങ്കി​ൽ ആക്രമി​ച്ചവരെ അറസ്റ്റ് ചെയ്തോയെന്നും കോടതി​യി​ൽ അവരെ കൊണ്ടുവരേണ്ടതല്ലേയെന്നും കോടതി​ ചോദി​ച്ചു. ഇവരെ പൊതുസ്ഥലത്ത് വച്ച് ആക്രമിക്കുമ്പോൾ അവർക്ക് സംരക്ഷണം നല്‍കാൻ പൊലീസിന് ഉത്തരവാദിത്തമില്ലേയെന്ന് ചോദി​ച്ച കോടതി, രണ്ടു തരം നീതി പൊലീസ് എങ്ങനെയാണ് നടപ്പാക്കുന്നതെന്ന് ആരാഞ്ഞു. സംഭവത്തി​ൽ വീഴ്ച്ച വരുത്തി​യ പൊലീസുകാർക്കെതി​രെ വി​ശദമായ പരാതി​ എഴുതി​ നൽകാൻ പ്രതി​കളോട് കോടതി​ നി​​ർദ്ദേശി​ച്ചു. പൊലീസുകാരുടെ പേരുകളും എഴുതി നൽകണം. പരാതി​ ലഭി​ച്ച ശേഷം കോടതി​ കേസ് വീണ്ടും പരി​ഗണി​ക്കും.