കൊച്ചി: 41-ാമത് എം.ജി സർവകലാശാലാ അത്‌ലറ്റിക്‌സ് ചാമ്പ്യൻഷിപ്പിൽ കോതമംഗലം എം.എ കോളേജ് പുരുഷ - വനിതാ വിഭാഗത്തിൽ കിരീടം ചൂടി. പുരുഷ വിഭാഗത്തിൽ 208.5 പോയിന്റും വനിതാ വിഭാഗത്തിൽ 174.5പോയിന്റും നേടി. പുരുഷ ടീം 15 സ്വർണവും 11 വെള്ളിയും 3 വെങ്കലവും, വനിതാ ടീം 11 സ്വർണവും 6 വെള്ളിയും 6 വെങ്കലവും സ്വന്തമാക്കി. എം. എ കോളേജിന്റെ ആനന്ദ് കൃഷ്ണ, ബിലിൻ ജോർജ്, കെസ്സിയ മറിയം ബെന്നി എന്നിവർ മീറ്റ് റെക്കാഡുകൾ നേടി.113.5 പോയിന്റുമായി ചങ്ങനാശ്ശേരി എസ് .ബി കോളേജ് രണ്ടാമതും 92പോയിന്റുമായി കാഞ്ഞിരപ്പള്ളി എസ്. ഡി. കോളേജ് മൂന്നാമതുമെത്തി.
പ്രൊഫ. പി.ഐ. ബാബു, എം.എ. ജോർജ്, ഡോ. ജോർജ് ഇമ്മാനുവൽ, പി.പി. പോൾ, കെ.പി. അഖിൽ എന്നിവരുടെ പരിശീലന മികവിലാണ് എം.എ. കോളേജിന്റെ ജൈത്രയാത്ര.
വിജയികൾക്ക് എം.ജി സിൻഡിക്കേറ്റ് അംഗം ഡോ.എ. ജോസ് സമ്മാനങ്ങൾ വിതരണം ചെയ്തു. എം.ജി. യൂണിവേഴ്‌സിറ്റി കായിക വകുപ്പ് ഡയറക്ടർ ഡോ. ബിനു ജോർജ് വറുഗീസ് അദ്ധ്യക്ഷത വഹിച്ചു. എം.എ. കോളേജ് അസോസിയേഷൻ സെക്രട്ടറി ഡോ. വിന്നി വറുഗീസ്, കോളേജ് പ്രിൻസിപ്പൽ ഡോ. മഞ്ജു കുര്യൻ, കായിക വിഭാഗം അദ്ധ്യാപിക അർച്ചന ഷാജി, എറണാകുളം മഹാരാജാസ് കോളേജ് കായിക വിഭാഗം മേധാവി റീന ജോസഫ് എന്നിവർ പ്രസംഗിച്ചു.