ആലങ്ങാട് : ആലുവ പറവൂർ റൂട്ടിൽ കെ.എസ് .ആർ ടി സി ബസി​ൽ വീണ്ടും മോഷണം.കരുമാല്ലൂർ പുതുക്കാട് സ്വദേശിനിയുടെ എട്ടു പവനോളം വരുന്ന സ്വർണാഭരണമാണ് ഇന്നലെ കവർന്നത്.തിങ്കളാഴ്ച രാവിലെ തട്ടാൻപടിയിലുള്ള കരുമാല്ലൂർ യൂണിയൻ ബാങ്ക് ശാഖയിൽ പണയംവച്ചിരുന്ന സ്വർണാഭരണങ്ങൾ തിരികെയെടുക്കാൻ വന്നതായിരുന്നു യുവതി. പണമടച്ച് തിരികെയെടുത്ത ആഭരണങ്ങൾ ബാഗിൽവച്ചശേഷം ബസി​ൽകയറി പറവൂരിലേക്കുപോയി അക്കൗണ്ടന്റായ യുവതി ഓഫീസിലെത്തി ബാഗ് തുറന്നുനോക്കിയപ്പോഴാണ് സ്വർണാഭരണങ്ങൾ നഷ്ടപ്പെട്ട വിവരമറിയുന്നത്. പറവൂർ പൊലീസിൽ പരാതി നൽകിയതി​നെത്തുടർന്ന് സി.സി.ടി.വി. ക്യാമറാദൃശ്യങ്ങൾ പരിശോധിച്ചു. യുവതി സ്വർണവുമായി പുറത്തേക്കിറങ്ങിയതായി മാത്രമേ കാണാൻ കഴിഞ്ഞിട്ടുള്ളൂ. അതുകൊണ്ടാണ് ബസി​ൽവച്ചാണ് മോഷണം നടന്നിരിക്കുന്നതെന്ന നിഗമനത്തിലെത്തിയിരിക്കുന്നത്.

കഴിഞ്ഞദിവസം ആലുവയിൽനിന്നും തട്ടാംപടിയിൽ വന്നിറങ്ങിയ വീട്ടമ്മയുടെ 10000 രൂപ നഷ്ടപ്പെട്ടിരുന്നു. ഏതാനും ആഴ്ചകൾക്കു മുൻപ് കെ.എസ് .ആർ ടി സി ബസി​ൽ യാത്രക്കാരിയുടെ സ്വർണമാല മോഷ്ടിക്കാൻ ശ്രമിച്ച രണ്ട് നാടോടികളെ യാത്രക്കാർ ഓടിച്ചിട്ടുപിടിച്ച് പൊലീസിലേൽപ്പിച്ചിരുന്നു.