ആലുവ: അദ്വൈതാശ്രമത്തിൽ നിന്ന് ഇന്നലെ രാവിലെ ആരംഭിച്ച 91-ാമത് ശിവഗിരി തീർത്ഥാടന - സർവമത സമ്മേളന ശതാബ്ദി പദയാത്രയ്ക്ക് ജില്ലയുടെ വിവിധ കേന്ദ്രങ്ങളിൽ ശ്രീനാരായണീയ സംഘടനകൾ ഭക്തിസാന്ദ്രമായ സ്വീകരണം നൽകി.

അദ്വൈതാശ്രമത്തിൽ സെക്രട്ടറി സ്വാമി ധർമ്മചൈതന്യയുടെയും മേൽശാന്തി പി.കെ. ജയന്തന്റെയും മുഖ്യകാർമ്മികത്വത്തിൽ പദയാത്രാ രഥത്തിലെ ഗുരു പ്രതിമയിൽ പ്രത്യേക പൂജകൾ നടത്തി. തുടർന്ന് സ്വാമി ധർമ്മചൈതന്യ ഔദ്യോഗിക അനുമതി നൽകി. ജാഥാ ക്യാപ്റ്റൻ എം.ഡി. സലീം, ചെയർമാൻ കെ.കെ. ജോഷി, ജനറൽ കൺവീനർ എൻ.കെ. ബൈജു എന്നിവർ സംസാരിച്ചു.വിവിധ കേന്ദ്രങ്ങളിലെ സ്വീകരണത്തിന് ശേഷം എരൂർ ശ്രീധർമ്മ കൽപദ്രുമ യോഗത്തിൽ (പേട്ട ക്ഷേത്രം) സമാപിച്ചു. ഇന്ന് രാവിലെ 7.30ന് പുനരാരംഭിക്കുന്ന പദയാത്ര വൈകിട്ട് 6.30ന് ആലപ്പുഴ ജില്ലയിലെ മാത്താനം ഭഗവതി ക്ഷേത്രത്തിൽ സമാപിക്കും. 30ന് പദയാത്ര ശിവഗിരിയിൽ എത്തും.