പെരുമ്പാവൂർ: മാമലക്കണ്ടത്ത് ജനവാസ മേഖലയിൽ ഇറങ്ങിയ കാട്ടാനക്കൂട്ടത്തിൽ നിന്നും കൂട്ടം തെറ്റിയ അമ്മയും കുഞ്ഞും സ്വകാര്യ വ്യക്തിയുടെ കിണറിൽ വീണു.

നേര്യമംഗലം റേഞ്ചിൽ വരുന്ന ഇളബ്ലാേശേരി ആദിവാസി ഊരിലെ മാമലക്കണ്ടം - മാങ്കുളം റോഡരികിൽ പേപ്പാറയിൽ പൊന്നമ്മ മത്തായിയുടെ കിണറിലാണ് ഇന്നലെ പുലർച്ചെ 5 മണിയോടെ ആനയും കുഞ്ഞും വീണത്.

രാവിലെ കിണറിൽ ആനയെക്കണ്ട വീട്ടുകാർ വിവരം അറിയിച്ചതി​നെത്തുടർന്ന് വനപാലകർ നാട്ടുകാരുടെ സഹായത്തോടെ ജെ.സി . ബി ഉപയോഗിച്ച് കിണർ ഇടിച്ച് ആനയെ കരയ്ക്ക് കയറ്റി. കരയ്ക്ക് കയറിയ അമ്മ ആന വനപാലകർക്ക് നേരെ പാഞ്ഞടുത്തു. ഉദ്യോഗസ്ഥർ ആകാശത്തേക്ക് വെടിയുതിർത്തതിനെ തുടർന്ന് വെടിശബ്ദം കേട്ട് തിരികെ വനത്തിലേക്ക് അമ്മയും കുഞ്ഞും ഓടിക്കയറി.

ആനശല്യം ഉള്ളതുകൊണ്ട് പൊന്നമ്മ മത്തായിയും കുടുംബവും വീട്ടി​ൽ നി​ന്ന് മാറിയാണ്​ താമസി​ക്കുന്നത്.

മേഖലയിൽ ആനശല്യം രൂക്ഷമായതിനാൽ പലവീടുകളിലും ആൾതാമസം ഇല്ല. മൃഗങ്ങളുടെ ശല്യം പരിഹരിക്കുന്നതിന് അടിയന്തര നടപടി കൈക്കൊള്ളണമെന്ന് നാട്ടുകാർ ആവശ്യപ്പെട്ടു.