മൂവാറ്റുപുഴ : നഗര റോഡുകളുടെ പുനർനിർമ്മാണം വേഗത്തിലാക്കാൻ മാത്യു കുഴൽനാടൻ എം.എൽ.എ വിളിച്ചുചേർത്ത ഉന്നതല യോഗത്തിൽ തീരുമാനം. നിർമ്മാണ പ്രവർത്തനങ്ങൾ ത്വരിതപ്പെടുത്താനും കൂടുതൽ സൗകര്യങ്ങൾ ഒരുക്കുന്നതിനുമായി ഉപകരണങ്ങൾ സ്ഥാപിക്കുന്നതിനുള്ള സ്ഥല പരിശോധന എം.എൽ.എയുടെയും വിവിധ വകുപ്പ് മേധാവികളുടെയും നേതൃത്വത്തിൽ പൂർത്തിയാക്കി.

റോഡ് നിർമ്മാണത്തിന് മുന്നോടിയായി വൈദ്യുതി പോസ്റ്റുകളും വാട്ടർ കണക്ഷനും മാറ്റിസ്ഥാപിക്കുന്ന നടപടി വേഗത്തിലാക്കാൻ ബന്ധപ്പെട്ട വകുപ്പുകൾക്ക് നിർദ്ദേശം നൽകിയതായി എം. എൽ.എ അറിയിച്ചു. അടിസ്ഥാന സൗകര്യങ്ങൾ ഒരുക്കുന്നതിന്റെ ഭാഗമായി യൂട്ടിലിറ്റി ഉപകരണങ്ങൾ സ്ഥാപിക്കുന്നതിന് ആവശ്യമായ സ്ഥലങ്ങൾ സംയുക്ത സംഘം മാർക്ക് ചെയ്തു. സർക്കാർ ഏറ്റെടുത്തതും നിർമ്മാണം ഒഴിവാക്കിയതുമായ സ്ഥലങ്ങളിൽ ഇവ സ്ഥാപിക്കാൻ ആവശ്യമായ സൗകര്യങ്ങളുണ്ടോ എന്ന പരിശോധനയാണ് പ്രധാനമായും നടന്നത്. വിവിധ വകുപ്പുകളുടെ കൈവശമുള്ളതും സർക്കാർ ഏറ്റെടുത്ത സ്വകാര്യ വ്യക്തികളുടെ സ്ഥലങ്ങളിലുമായാണ് സൗകര്യങ്ങൾ ഒരുക്കുക. വൈദ്യതിവിതരണ സംവിധാനങ്ങൾക്കായി പ്രത്യേക ഡക്റ്റുകളുടെ നിർമ്മാണം പൂർത്തിയായിവരുന്നു. മുനിസിപ്പൽ ചെയർമാൻ പി. പി. എൽദോസ് , കെ ആർ .എഫ്. ബി സൂപ്രണ്ടിംഗ് എൻജിനീയർ മഞ്ജുഷ. പി.ആർ, എക്സിക്യുട്ടീവ് എൻജിനിയർ ജയരാജ്,​ കെ.എസ്.ഇ.ബി അസിസ്റ്റന്റ് ഇലക്ട്രിക്കൽ ഇൻസ്പെക്ടർ സൂരജ്,​ എൻ.എം, കി.എഫ്.ബി അസി. പ്രൊജക്ട് മാനേജർ അമല ചന്ദ്രൻ തുടങ്ങിയവരും യോഗത്തിലും പരിശോധനയിലും പങ്കെടുത്തു.