കൊച്ചി: കുടുംബശ്രീയുടെ 25 വർഷത്തെ ചരിത്രം പ്രമേയമാക്കിയ മെഗാ ചവിട്ടുനാടകം അവതരിപ്പിച്ച് വേൾഡ് ടാലന്റ് റെക്കാഡ് സ്വന്തമാക്കി ജില്ലയിലെ കുടുംബശ്രീ പ്രവർത്തകർ. കൊച്ചി ജവഹർലാൽ നെഹ്റു സ്റ്റേഡിയത്തിൽ നടക്കുന്ന ദേശീയ സരസ് മേളയുടെ ഭാഗമായാണ് മെഗാ ചവിട്ടുനാടകം സംഘടിപ്പിച്ചത്.

എറണാകുളം ഡർബാർ ഗ്രൗണ്ടിൽ ചുവടി 2023 എന്ന പേരിലായിരുന്നു പരിപാടി. സംസ്ഥാന മിഷൻ ആവിഷ്‌കരിച്ച് ജില്ലാ മിഷന്റെ നേതൃത്വത്തിൽ അവതരിപ്പിച്ച ചവിട്ടുനാടകത്തിൽ ജില്ലയിലെ 14 ബ്ലോക്കുകളിൽ നിന്നു തിരഞ്ഞെടുത്ത 503 കുടുംബശ്രീ അംഗങ്ങളാണ് കലാപ്രകടനം കാഴ്ചവച്ചത്. ഓൾ ഗിന്നസ് വേൾഡ് റെക്കാഡ്സ് സംസ്ഥാന പ്രസിഡന്റ് ഗിന്നസ് സത്താർ ആദൂർ, ടി.ആർ.ബി അധികൃതരായ ഡോ. വിന്നർ ഷെരീഫ്, രക്ഷിതാ ജെയിൻ എന്നിവർ വിധികർത്താക്കളായി. ചവിട്ടുനാടക കലാകാരൻ രാജു നടരാജന്റെ നേതൃത്വത്തിൽ രണ്ടാഴ്ചത്തെ പരിശീലനത്തിന് ശേഷമായിരുന്നു അവതരണം.

ജില്ലാ മിഷൻ കോ ഓർഡിനേറ്റർ ടി.എം. റെജീന, പ്രോഗ്രാം ഓഫീസർ രതീഷ് പീലിക്കോട് എന്നിവർ ചടങ്ങിൽ പങ്കെടുത്തു.