കാലടി: തിരുവൈരാണിക്കുളം മഹാദേവ ക്ഷേത്രത്തിൽ ശ്രീപാർവ്വതിദേവിയുടെ നട ഇന്നലെ രാത്രി 8ന് തുറന്നു. ഇനി 11 ദിവസം ഭക്തർക്ക് ദേവീദർശനം നടത്താം.

നടതുറപ്പുത്സവത്തിന് തുടക്കം കുറിച്ചുള്ള തിരുവാഭരണ ഘോഷയാത്ര ഇന്നലെ വൈകിട്ട് നാലുമണിയോടെ അകവൂർ മനയിൽ നിന്ന് ആരംഭിച്ചു.

ഘോഷയാത്ര ക്ഷേത്രത്തിൽ എത്തിയതിനു പിന്നാലെ തിരുവാഭരണങ്ങൾ അണിയിച്ച്, ദേവിയുടെ തോഴിയായ പുഷ്പിണിയുടെ അനുവാദത്തോടെ മേൽശാന്തി ശ്രീപാർവതീ ദേവിയുടെ നട തുന്നു.

ഒരു വർഷം നീണ്ട കാത്തിരിപ്പിനൊടുവിൽ ആയിരക്കണക്കിന് ഭക്തർ ചടങ്ങുകൾ ദർശിക്കാനെത്തി. ക്ഷേത്ര ട്രസ്റ്റ് പ്രസിഡന്റ് അകവൂർ കുഞ്ഞനിയൻ നമ്പൂതിരിപ്പാട്, സെക്രട്ടറി കെ.എ. പ്രസൂൺ കുമാർ, വൈസ് പ്രസിഡൻറ് പി.യു. രാധാകൃഷ്ണൻ, ജോയിന്റ് സെക്രട്ടറി അശോകൻ കൊട്ടാരപ്പിള്ളി, മാനേജർ എം.കെ. കലാധരൻ, ഊരാൺമ പ്രതിനിധികളായ അകവൂർ കൃഷ്ണൻ നമ്പൂതിരിപ്പാട്, അകവൂർ ശങ്കരൻ നമ്പൂതിരിപ്പാട്, അകവൂർ ഹരി, വെടിയൂർ കൃഷ്ണൻ നമ്പൂതിരിപ്പാട് തുടങ്ങിയവർ ചടങ്ങുകൾക്ക് മേൽനോട്ടം വഹിച്ചു.

ദിവസവും രാവിലെ 9 മുതൽ ഭക്തജനങ്ങൾക്ക് അന്നദാനവും ഉണ്ടാകും.