കൊച്ചി: പി.ടി. തോമസ് പരിസ്ഥിതി രാഷ്ട്രീയത്തെ ഉയർത്തിപ്പിടിച്ച നേതാവായിരുന്നെന്ന് പ്രതിപക്ഷ നേതാവ് വി.ഡി. സതീശൻ. പി.ടിയുടെ പേരിലുള്ള പുരസ്‌കാരത്തിന് ഏറ്റവും അർഹനാണ് മാധവ് ഗാഡ്ഗിലെന്നും അദ്ദേഹം പറഞ്ഞു. എറണാകുളം ടൗൺ ഹാളിൽ മാനവ സംസ്‌കൃതിയുടെ പി.ടി. തോമസ് അനുസ്മരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
കേന്ദ്ര ഗവൺമെന്റെ് നിയോഗിച്ച പശ്ചിമഘട്ട പരിസ്ഥിതി വിദഗ്ദ്ധ സമിതി ചെയർമാനും പ്രമുഖ പരിസ്ഥിതി പ്രവർത്തകനുമായ മാധവ് ഗാഡ്ഗിലിനുള്ള പ്രഥമ പി.ടി. തോമസ് പുരസ്കാരം വി.ഡി. സതീശൻ സമ്മാനിച്ചു. മാധവ് ഗാഡ്ഗിലിന് വേണ്ടി സാമൂഹ്യ പ്രവർത്തകൻ അഡ്വ. വിനോദ് പയ്യടമാണ് ഏറ്റുവാങ്ങിയത്.
ഇക്കൊല്ലത്തെ യുവ പ്രതിഭാ പുരസ്കാരം തിരുവനന്തപുരം ലാ കോളേജ് യൂണിയൻ ചെയർപേഴ്‌സൺ അപർണ കെ. പ്രസന്നനും തൃശൂർ കേരള വർമ്മ കോളേജിലെ എസ്. ശ്രീക്കുട്ടനും സമ്മാനിച്ചു. മാനവ സംസ്‌കൃതി സംസ്ഥാന ചെയർമാൻ അനിൽ അക്കര അദ്ധ്യക്ഷത വഹിച്ചു. ജെബി മേത്തർ എം.പി, എം.എൽ.എമാരായ കെ. ബാബു, ടി.ജെ. വിനോദ്, റോജി എം. ജോൺ, മുൻ എം.പി കെ.പി. ധനപാലൻ, ഡി.സി.സി പ്രസിഡന്റ് മുഹമ്മദ് ഷിയാസ്, കെ.എസ്.യു സംസ്ഥാന പ്രസിഡന്റ് അലോഷ്യസ് സേവ്യർ തുടങ്ങിയവർ സംസാരിച്ചു.