കുമളി: ജലനിരപ്പ് കുതിച്ചുയർന്നതോടെ മുല്ലപ്പെരിയാർ അണക്കെട്ടിന്റെ സ്പിൽവേ ഷട്ടറുകൾ ഇന്ന് രാവിലെ 10ന് തുറക്കും. ഷട്ടറുകൾ ഘട്ടം ഘട്ടമായി തുറന്ന് സെക്കൻഡിൽ പതിനായിരം ഘനയടി വെള്ളം വരെ പെരിയാറ്റിലേക്ക് ഒഴുക്കുവാനാണ് തമിഴ്നാടിന്റെ തീരുമാനം. ഇന്നലെ വൈകിട്ട് നാല് മണിയോടെ ജലനിരപ്പ് 138 അടിയായപ്പോൾ തമിഴ്നാട് രണ്ടാമത്തെ മുന്നറിയിപ്പ് കേരളത്തിന് നൽകി. 138.20 അടിയാണ് അവസാനം വിവരം ലഭിക്കുമ്പോൾ മുല്ലപ്പെരിയാറിലെ ജലനിരപ്പ്. സെക്കന്റിൽ 11060.79 ഘനയടി വെള്ളം ഡാമിലേക്ക് ഒഴുകിയെത്തുമ്പോൾ 1867 ഘനയടി വീതം തമിഴ്‌നാട് സ്വദേശത്തേക്ക് കൊണ്ട് പോകുന്നുണ്ട്. ജലനിരപ്പ് 142 അടിയിലേക്കെത്തിയാൽ 2000 ഘനയടി തമിഴ്‌നാട്ടിലേക്കും ബാക്കി വരുന്നത് കേരളത്തിലേക്കും തുറന്നു വിടാനാണ് തമിഴ്‌നാടിന്റെ തീരുമാനം. കുമളിയിൽ മഴ കുറഞ്ഞിട്ടുണ്ടെങ്കിലും അണക്കെട്ടിന്റെ വൃഷ്ടി പ്രദേശത്തോട് ചേർന്നുള്ള തമിഴ്‌നാട് വനമേഖലയിൽ മഴ തുടരുന്നതാണ് ജലനിരപ്പ് ഉയരാൻ കാരണം. മഴ തുടരുകയും നീരൊഴുക്ക് ശക്തമാകുകയും ചെയ്താൽ രാത്രി തന്നെ മുല്ലപെരിയാർ അണക്കെട്ടിന്റെ അനുവദനീയമായ സംഭരണ ശേഷിയായ 142 അടിയിലെത്തും. അങ്ങനെ വന്നാൽ രാത്രിയിൽ തന്നെ തമിഴ്നാട് ഷട്ടറുകൾ തുറന്നേക്കുമെന്നാണ് മുൻ അനുഭവങ്ങൾ സൂചിപ്പിക്കുന്നത്. പെരിയാർ തീരത്തുള്ളവർക്ക് ജില്ലാ ഭരണകൂടം ജാഗ്രത നിർദ്ദേശം നൽകിയിട്ടുണ്ട്.

തമിഴ്നാട്ടിൽ കനത്ത മഴ,

വൈഗ ഡാമും നിറയുന്നു

മുല്ലപ്പെരിയാറിൽ നിന്ന് കൊണ്ടുപോകുന്ന വെള്ളം സംഭരിച്ചു നിറുത്തുന്ന തമിഴ്നാട്ടിലെ വൈഗ അണക്കെട്ട് പരമാവധി സംഭരണ ശേഷിയോട് അടുക്കുകയാണ്. 68.8 അടിയാണ് തിങ്കളാഴ്ച രാത്രിയിലെ വൈഗയിലെ ജലനിരപ്പ്. വൈഗയുടെ പരമാവധി സംഭരണ ശേഷി 71 അടിയാണെങ്കിലും 70 അടിയെത്തിയാൽ ഷട്ടറുകൾ തുറക്കും. തേനി മേഖലയിൽ കനത്ത മഴ തുടരുകയാണ്. ഇന്നലെ വൈഗയുടെ വൃഷ്ടി പ്രദേശത്ത് 88.5 മില്ലിമീറ്റർ മഴ രേഖപ്പെടുത്തി. വൈഗയിൽ നിന്ന് വെള്ളം ഒഴുകി എത്തുന്ന സ്ഥലങ്ങളിൽ തമിഴ്നാട് ജാഗ്രത നിർദ്ദേശം നൽകിയിട്ടുണ്ട്.

ആശങ്ക വേണ്ട

ഇടുക്കിയിൽ കുറവ്

മുല്ലപ്പെരിയാർ തുറന്നാൽ ജലമെത്തുന്ന പെരിയാറിലും ഇടുക്കി അണക്കെട്ടിലും വെള്ളം കുറവായതിനാൽ മുല്ലപ്പെരിയാർ തുറന്നാലും നിലവിൽ ആശങ്കപ്പെടേണ്ട സാഹചര്യമില്ല. വള്ളക്കടവ്, വണ്ടിപ്പെരിയാർ, ചപ്പാത്ത്, ആലടി, ഉപ്പുതറ, അയ്യപ്പൻകോവിൽ വഴി ഇടുക്കി സംഭരണിയിലേക്ക് ആറ് മണിക്കൂർ കൊണ്ട് വെള്ളമെത്തും. ഇടുക്കി സംഭരണിയിൽ നിലവിൽ അവശേഷിക്കുന്നത് 2364.56 അടി വെള്ളമാണ്. ആകെ സംഭരണ ശേഷിയുടെ 58.74 ശതമാനമാണിത്. കഴിഞ്ഞ വർഷം ഇതേ സമയത്തേക്കാൾ 15.74 അടി കുറവാണിത്. കഴിഞ്ഞ വർഷം ഇതേ സമയം 2380.3 അടിയായിരുന്നു ജലശേഖരം- 74.10%. ഇന്നലെ രാവിലെ വരെയുള്ള 24 മണിക്കൂറിൽ വൃഷ്ടി പ്രദേശത്ത് 3.3 സെന്റി മീറ്റർ മഴ ലഭിച്ചപ്പോൾ 6.122 ദശലക്ഷം യൂണിറ്റ് വൈദ്യുതി ഉത്പാദിപ്പിക്കാനാവശ്യമായ വെള്ളം ഒഴുകിയെത്തി. അതേ സമയം മൂലമറ്റത്ത് നിന്നുള്ള വൈദ്യുതി ഉത്പാദനം 1.5 ദശലക്ഷം യൂണിറ്റിൽ ക്രമീകരിച്ചിരിക്കുകയാണ് കെഎസ്ഇബി. കൂടുതൽ വെള്ളം എത്തുന്നത് വേനൽ വരാനിരിക്കെ കെ.എസ്.ഇ.ബിയ്ക്ക് ആശ്വാസമാകും.