ചെറുതോണി: നാരുപാറ ശ്രീ അന്നപൂർണ്ണേശ്വരി ഭദ്രകാളി ദേവി ഗുരുദേവ ക്ഷേത്രത്തിലെ ശ്രീമദ് ഭാഗവത സപ്താഹ യജ്ഞം ആരംഭിച്ചു. തുടർച്ചയായി 17-ാമത് വർഷമാണ് ഇവിടെ ഭാഗവത സപ്താഹം നടക്കുന്നത്. ഭാഗവത സപ്താഹ യജ്ഞത്തിന് തുടക്കംകുറിച്ച് എസ്.എൻ.ഡി.പി യോഗം ഇടുക്കി യൂണിയൻ സെക്രട്ടറി സുരേഷ് കോട്ടയ്ക്കകത്ത് ഭദ്രദീപ പ്രകാശനം നടത്തി. വിഗ്രഹ പ്രതിഷ്ഠയും അനുഗ്രഹ പ്രഭാഷണവും സുരേഷ് ശ്രീധരൻ തന്ത്രികൾ നിർവഹിച്ചു. യൂണിയൻ പ്രസിഡന്റ് പി. രാജൻ മുഖ്യപ്രഭാഷണം നടത്തി. തുടർന്ന് ആചാര്യ വരണം, നിറപറ സമർപ്പണം, കലവറ നിറയ്ക്കൽ, ഭാഗവത മഹാത്മ്യ പ്രഭാഷണം എന്നിവ നടത്തി. ഭാഗവത സപ്താഹ യജ്ഞാചാര്യൻ കുമേഷ് കുമാർ സൗപർണ്ണികയും​ യജ്ഞ പൗരാണികർ സത്യൻ അയിരൂർ, പക്കാല ത്യാഗരാജൻ, എരമല്ലൂർ പ്രകാശൻ എന്നിവരുമാണ്. ക്ഷേത്രം ഉപദേഷ്ടാവ് ശിവഗിരി മഠത്തിലെ ശ്രീമദ് ബോധിതീർത്ഥ സ്വാമികളും ക്ഷേത്രം മേൽശാന്തി അമൽ മഹാദേവൻ ശാന്തികളുമാണ് ലോകക്ഷേമാർത്ഥം നടത്തപ്പെടുന്ന അതിമഹനീയമായ മഹായജ്ഞത്തിൽ പങ്കെടുക്കുന്നത്. ആത്മീയ നിർവൃതി നേടുന്നതിനുള്ള അസുലഭ അവസരമാണ് ക്ഷേത്രത്തിൽ ഒരുക്കിയിട്ടുള്ളതെന്ന് ഭാരവാഹികളായ ടി.കെ. സുരേഷ് ബാബു, തങ്കച്ചൻ പുത്തേട്ട്, കെ.ജെ. സുനിൽകുമാർ, വിശ്വനാഥൻ ചാലിൽ, സന്തോഷ് വാത്താത്ത്, അഖിൽ സാബു പാടയ്ക്കൽ എന്നിവർ അറിയിച്ചു. സപ്താഹ യജഞം 27ന് സമാപിക്കും.