കണ്ണൂർ: ലോകസഭ തിരഞ്ഞെടുപ്പിന് മുന്നോടിയായി ഇന്ത്യയെ വീണ്ടെടുക്കാൻ ഇന്ത്യയോടൊപ്പം എന്ന മുദ്രാവാക്യമുയർത്തി മുസ്ലിം ലീഗ് ജില്ല കമ്മിറ്റിയുടെ ആഭിമുഖ്യത്തിൽ ജനുവരി 25 മുതൽ ഫെബ്രുവരി 5 വരെ ജില്ലയിൽ ദേശരക്ഷാ യാത്ര സംഘടിപ്പിക്കുമെന്ന് നേതാക്കൾ വാർത്താ സമ്മേളനത്തിൽ അറിയിച്ചു. ജില്ലാ പ്രസിഡന്റ് അഡ്വ. അബ്ദുൽ കരീം ചേലേരി നായകനും ജനറൽ സെക്രട്ടറി കെ.ടി. സഹദുള്ള ഉപനായകനും ട്രഷറർ മഹമൂദ് കടവത്തൂർ ഡയറക്ടറുമായ ദേശരക്ഷാ യാത്ര ജില്ലയിലെ എല്ലാ നിയോജക മണ്ഡലങ്ങളിലും പഞ്ചായത്ത് മുൻസിപ്പൽ മേഖലാതലങ്ങളിൽ പര്യടനം നടത്തി കണ്ണൂരിൽ പൊതുസമ്മേളനത്തോടെ സമാപിക്കും .
മുസ്ലിം ലീഗ് സംസ്ഥാന പ്രസിഡന്റ് പാണക്കാട് സയ്യിദ് സാദിക്കലി ശിഹാബ് തങ്ങൾ 25ന് വൈകുന്നേരം 4 മണിക്ക് പയ്യന്നൂരിൽ ദേശരക്ഷാ യാത്ര ഉദ്ഘാടനം ചെയ്യും. തുടർന്ന് 26 പയ്യന്നൂർ, 27 കല്ല്യാശ്ശേരി, 28 അഴീക്കോട്, 29 തളിപ്പറമ്പ്,
30 പേരാവൂർ, 31 ഇരിക്കൂർ, ഫെബ്രുവരി 1 കൂത്തുപറമ്പ്, 2 മട്ടന്നൂർ, 3 ധർമ്മടം, 4 തലശ്ശേരി, 5 കണ്ണൂർ എന്നിങ്ങനെയാണ് മണ്ഡലം തലങ്ങളിൽ പര്യടനം നടത്തുക. 31ന് ജില്ലയിലെ മുസ്ലിം ലീഗ് നേതാക്കളും പ്രവർത്തകന്മാരും പുതുവത്സരാശംസ സന്ദേശങ്ങൾ കൈമാറും. 19ന് വൈകുന്നേരം 4 മണിക്ക് കണ്ണൂർ റോയൽ ഒമേഴ്സ് ഹോട്ടലിൽ സ്‌നേഹസംവാദം. പോസ്റ്റർഡേ, സ്പീക്കേഴ്സ് വർക്ക് ഷോപ്പ് , തീം സോംഗ് റിലീസിംഗ്, പതാകദിനം എന്നീ പരിപാടികൾ സംഘടിപ്പിക്കും. റിപ്പബ്ലിക് ദിനമായ ജനുവരി 26ന് രാവിലെ 7 മണിക്ക് പയ്യന്നൂരിലെ ഉളിയത്ത്കടവിൽ വച്ച് യാത്ര അംഗങ്ങൾ ഭരണഘടന പ്രതിജ്ഞ എടുക്കും. 30 ന് 11മണിക്ക് പേരാവൂരിൽ രക്തസാക്ഷി പ്രതിജ്ഞ. ഇ. അഹമ്മദിന്റെ ചരമദിനത്തോടനുബന്ധിച്ച് ഫെബ്രുവരി 2ന് കണ്ണൂർ സിറ്റിയിലുള്ള അദ്ദേഹത്തിന്റെ കബറിടത്തിൽ രാവിലെ 7 മണിക്ക് യാത്ര അംഗങ്ങൾ പ്രാർത്ഥന നടത്തുമെന്നും അഡ്വ.അബ്ദുൽ കരീം ചേലേരി, കെ.ടി സഹദുള്ള, മഹമൂദ് കടവത്തൂർ എന്നിവർ അറിയിച്ചു.