കണ്ണൂർ: 'ആടാം പാടാം.. അവളെന്ന വേർതിരിവില്ലാതെ' എന്ന ടാഗ് ലൈനോട് കൂടി ജില്ലാ പഞ്ചായത്ത് സംഘടിപ്പിക്കുന്ന ഷീ നൈറ്റ് ഫെസ്റ്റ് ഇന്ന്. ജില്ലാ പഞ്ചായത്ത്, കുടുംബശ്രീ, വനിതാ ശിശു വികസന വകുപ്പ് എന്നിവയുടെ സഹകരണത്തോടെ നടക്കുന്ന പരിപാടിയിൽ ജില്ലയിലെ വിവിധയിടങ്ങളിൽ നിന്ന് അര ലക്ഷത്തോളം സ്ത്രീകൾ പങ്കാളികളാകും. പുതുവത്സര രാവിൽ പയ്യാമ്പലം ബീച്ചിൽ സംഘടിപ്പിക്കുന്ന പരിപാടി ഇന്ന് വൈകിട്ട് 6ന് മുൻ ആരോഗ്യ മന്ത്രി പി.കെ ശ്രീമതി ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്റ് പി.പി ദിവ്യ അദ്ധ്യക്ഷയാകും. പ്രമുഖ ചലച്ചിത്രതാരം കണ്ണൂർ ശ്രീലതയെ ആദരിക്കും. ജില്ലയിലെ പ്രമുഖ സ്ത്രീ വ്യക്തിത്വങ്ങൾ പരിപാടിയുടെ ഭാഗമാകും. രാത്രി 10.30ന് മന്ത്രി രാമചന്ദ്രൻ കടന്നപ്പള്ളിക്ക് ജില്ലാ പഞ്ചായത്തിന്റെ ആദരം നൽകും. ഫെസ്റ്റിന്റെ പ്രചരണാർത്ഥം ടാഗ് ലൈൻ മത്സരം, റീൽസ് മത്സരം, പോസ്റ്റർ ക്യാമ്പയിൻ തുടങ്ങിയ വിവിധ പരിപാടികൾ നേരത്തെ സംഘടിപ്പിച്ചിരുന്നു.

സ്ത്രീകളുടെ വടംവലി, മൈലാഞ്ചി ഇടൽ
വൈകിട്ട് 3. 30 മുതൽ പയ്യാമ്പലം പാർക്കിൽ മൈലാഞ്ചി ഇടൽ മത്സരം നടക്കും. രണ്ടു വേദികളിലായി ജില്ലയിൽ നിന്നുള്ള സ്ത്രീകളുടെ 75 ഇനം കലാപരിപാടികൾ അരങ്ങേറും. ജനപ്രതിനിധികളുടെ നൃത്തനൃത്യങ്ങൾ, ഉദ്യോഗസ്ഥരുടെ കലാപരിപാടികൾ, വിൽക്കലാ മേള, സംഗീതശില്പം, കളരിപ്പയറ്റ്, നാടകം, ശിങ്കാരിമേളം, വ്യത്യസ്ത നൃത്ത പരിപാടികൾ എന്നിവയും അരങ്ങേറും. രാത്രി 11ന് സ്ത്രീകളുടെ വടംവലി മത്സരം പയ്യാമ്പലം കടപ്പുറത്ത് നടക്കും. ശേഷം ലാസ്റ്റ് ബെഞ്ച് മ്യൂസിക് ബാന്റിന്റെ കലാപരിപാടികളും ഡി.ജെ നൈറ്റും അരങ്ങേറും.

സ്ത്രീകൾക്ക് ഫലപ്രദമായ സാമൂഹിക ഇടപെടലുകൾ സാദ്ധ്യമാക്കുക എന്ന ലക്ഷ്യത്തോടെയാണ് പരിപാടി നടത്തുന്നത്.

പി.പി ദിവ്യ, ജില്ലാ പഞ്ചായത്ത് പ്രസിഡന്റ്