പാലാ: മുഖ്യമന്ത്രിയും മുഴുവൻ മന്ത്രിമാരും പങ്കെടുക്കുന്ന നവകേരള സദസിനു മുന്നോടിയായുള്ള പ്രചാരണ പ്രവർത്തനങ്ങൾ പാലാ നിയോജക മണ്ഡലത്തിലുടനീളം ആരംഭിച്ചു. ബൂത്ത് തലത്തിലുള്ള വീട്ടുമുറ്റ സദസുകൾ ഇതിനോടകം ആരംഭിച്ചു കഴിഞ്ഞു. നവകരള സദസിലേക്കുള്ള മുഖ്യമന്ത്രിയുടെ ക്ഷണക്കത്ത് എല്ലാ വീടുകളിലും എത്തിക്കും. പ്രത്യേകം തയ്യാറാക്കിയ ബ്രോഷറുകളും ഇതോടൊപ്പം വീടുകളിൽ നൽകും.
പ്രമുഖ വ്യക്തികളെ പങ്കെടുപ്പിച്ചു കൊണ്ട് നിയോജക മണ്ഡലം വികസന സെമിനാർ നടത്തും. സദസിന് മുന്നോടിയായി പാലാ നഗരത്തിലും പഞ്ചായത്ത് കേന്ദ്രങ്ങളിലും വിപുലമായ വിളംബര ജാഥകളും സംഘടിപ്പിച്ചിട്ടുണ്ട്.
പബ്‌ളിക് റിലേഷൻസ് വകുപ്പിന്റെ ആഭിമുഖ്യത്തിൽ സർക്കാർ നടപ്പാക്കിയ വികസന പദ്ധതികളുടെ അവതരണവും സംഘടിപ്പിച്ചിട്ടുണ്ട്.
സംഘാടക സമിതി ജനറൽ കൺവീനർ പാലാ ആർ.ഡി.ഒ പി.ജി.രാജേന്ദ്രബാബുവിന്റെ അദ്ധ്യക്ഷതയിൽ ചേർന്ന പ്രചാരണ സമിതി യോഗം പരിപാടികൾക്ക് അന്തിമരൂപം നൽകി. പ്രചാരണ സമിതി ചെയർമാൻ സാവിയോ കാവുകാട്ട്, ഷാർളി മാത്യു, ബിജു പാലൂപടവൻ, ജയ്‌സൺ മാന്തോട്ടം, കൺവീനർ ഡെപ്യൂട്ടി തഹസിൽദാർ ബി.മജ്ജിത്, ജി.അനൂപ് എന്നിവർ അവലോകന യോഗത്തിൽ പങ്കെടുത്തു.