കോട്ടയം : വോട്ടർ പട്ടികയിൽ പേരുചേർക്കൽ ക്ഷണിച്ച് കെ.എസ്.ആർ.ടി.സിയുടെ ഡബിൾ ഡെക്കർ ബസ് ജില്ലയിൽ യാത്ര തുടങ്ങി. ചങ്ങനാശേരി സ്റ്റാൻഡിൽ നിന്നാരംഭിച്ച യാത്ര ജില്ലാ കളക്ടർ വി. വിഗ്‌നേശ്വരി ഫ്ലാഗ് ഒഫ് ചെയ്തു. പുഞ്ച സ്‌പെഷ്യൽ ഓഫീസറും സ്വീപ്പിന്റെ ജില്ലാ നോഡൽ ഓഫീസറുമായ അമൽ മഹേശ്വർ, തിരഞ്ഞെടുപ്പ് ഡെപ്യൂട്ടി കളക്ടർ എം.എച്ച്. ഹരീഷ്, തിരഞ്ഞെടുപ്പ് ലിറ്ററസി ക്ലബ് കോ-ഓർഡിനേറ്റർ വിപിൻ വർഗീസ് എന്നിവർ പങ്കെടുത്തു. തിരുവനന്തപുരം നഗരത്തിൽ സർവീസ് നടത്തുന്ന കെ.എസ്.ആർ.ടി.സിയുടെ മേൽക്കൂരയില്ലാത്ത ഡബിൾ ഡെക്കർ സിറ്റി സർവീസ് ബസാണ് ജില്ലയിലെത്തിച്ചത്. ബസിൽ സൗജന്യയാത്രയ്ക്കും വോട്ടർപട്ടികയിൽ പേരു ചേർക്കാനും ഇന്നും അവസരമുണ്ടായിരിക്കും. വിനോദസഞ്ചാരകേന്ദ്രങ്ങളായ ഇലവീഴാപൂഞ്ചിറ, ഇല്ലിക്കൽ കല്ല്, കുമരകം, വൈക്കം ബീച്ച് എന്നിവിടങ്ങളിൽ ഇന്ന് പ്രത്യേക ക്യാമ്പയിൻ സംഘടിപ്പിക്കും. പരിപാടിയുടെ ഭാഗമായി മ്യൂസിക് ഷോ, ഫുഡ് സ്റ്റാളുകൾ എന്നിവയുമുണ്ട്. വോട്ടർ എന്റോൾമെന്റിന് പ്രത്യേക സ്റ്റാളുകളും സജ്ജീകരിക്കും.

ഹ്രസ്വദൂര യാത്ര, സമ്മാനവും

പ്രായവും വിലാസവും തെളിയിക്കുന്ന അസൽ രേഖകളും (ആധാർ കാർഡ്, പാസ്‌പോർട്ട്) ഫോട്ടോയും വീട്ടിലെ വോട്ടറുടെയോ അയൽവാസിയുടെയോ വോട്ടർ കാർഡിന്റെ പകർപ്പുമായെത്തിയാൽ ബസിലെ കൗണ്ടറിൽ വോട്ടർ പട്ടികയിൽ പേരു ചേർത്തു രജിസ്‌ട്രേഷൻ നടത്താം. തുടർന്ന് ഡബിൾ ഡക്കറിൽ ഹ്രസ്വദൂരയാത്ര സൗജന്യമായി നടത്താം. രജിസ്റ്റർ ചെയ്യുന്നവർക്ക് നൽകുന്ന സമ്മാനക്കൂപ്പണുകളിൽ നിന്ന് നറുക്കെടുപ്പിൽ വിജയിക്കുന്നവർക്ക് ആകർഷകമായ സമ്മാനങ്ങളും നൽകും.