കോട്ടയം : ജനങ്ങൾക്കരികിലേക്ക് മന്ത്രിസഭ ഒന്നാകെ എത്തുന്ന നവകേരളസദസിന് ജില്ലയിൽ ഇന്ന് തുടക്കം. ഉച്ചകഴിഞ്ഞ് മൂന്നിന് പൂഞ്ഞാർ നിയോജകമണ്ഡലത്തിലെ മുണ്ടക്കയം സെന്റ് മേരീസ് ലാറ്റിൻ ചർച്ച് ഗ്രൗണ്ടിലെ നവകേരളസദസിലേക്കാണ് മുഖ്യമന്ത്രി പിണറായി വിജയനും സഹമന്ത്രിമാരും ആദ്യമെത്തുന്നത്. 5000 പേർക്കുള്ള ഇരിപ്പിടം ഇവിടെ ക്രമീകരിച്ചിട്ടുണ്ട്. സെബാസ്റ്റ്യൻ കുളത്തുങ്കൽ എം.എൽ.എ അദ്ധ്യക്ഷനാകും.
വൈകിട്ട് നാലിന് കാഞ്ഞിരപ്പള്ളി നിയോജകമണ്ഡലത്തിലെ നവകേരളസദസ് പൊൻകുന്നം ഗവൺമെന്റ് ഹയർ സെക്കൻഡറി സ്‌കൂൾ ഗ്രൗണ്ടിൽ നടക്കും. ഇവിടെ 7000 പേർക്കിരിക്കാവുന്ന പന്തൽ നിർമാണം പൂർത്തിയായിട്ടുണ്ട്. ചീഫ് വിപ്പ് ഡോ. എൻ. ജയരാജ് അദ്ധ്യക്ഷനായിരിക്കും. ആദ്യദിനത്തിലെ അവസാനസദസ് പാലാ നിയോജകമണ്ഡലത്തിലാണ് വൈകിട്ട് അഞ്ചിന് പാലാ മുനിസിപ്പൽ സ്റ്റേഡിയത്തിൽ നടക്കുന്ന സദസിൽ 7000 പേർക്ക് ഇരിക്കാനുള്ള പന്തലാണ് ഒരുക്കിയിരിക്കുന്നത്. തോമസ് ചാഴികാടൻ എം.പി അദ്ധ്യക്ഷനായിരിക്കും. രണ്ടാം ദിനമായ നാളെ കോട്ടയം ജറുസലേം മാർത്തോമ പള്ളി ഹാളിൽ രാവിലെ ഒമ്പതിന് ജില്ലയിലെ ആദ്യ പ്രഭാതയോഗം നടക്കും. കോട്ടയം, ചങ്ങനാശേരി, പുതുപ്പള്ളി, കാഞ്ഞിരപ്പള്ളി, പൂഞ്ഞാർ, എറ്റുമാനൂർ നിയമസഭ മണ്ഡലങ്ങളിൽനിന്നുള്ള 200 വിശിഷ്ടാതിഥികൾ പങ്കെടുക്കും. രാവിലെ 10 ന് ഏറ്റുമാനൂർ, 2 ന് പുതുപ്പള്ളി, വൈകിട്ട് നാലിന് ചങ്ങനാശ്ശേരി, ആറിന് കോട്ടയം നിയോജകമണ്ഡലം എന്നിവിടങ്ങളിലെ സദസ് നടക്കും. 14 ന് രാവിലെ ഒമ്പതിന് കുറവിലങ്ങാട് പള്ളി പാരിഷ് ഹാളിൽ പ്രഭാതയോഗം. കടുത്തുരുത്തി, വൈക്കം, പാലാ മണ്ഡലങ്ങളിൽനിന്നുള്ള 200 വിശിഷ്ടാതിഥികൾ പങ്കെടുക്കും. തുടർന്ന് കടുത്തുരുത്തി നിയോജകമണ്ഡലത്തിലെ യോഗം കുറവിലങ്ങാട് ദേവമാതാ കോളജ് മൈതാനത്തിൽ രാവിലെ 11 നും വൈക്കം മണ്ഡലത്തിലെ സദസ് വൈക്കം ബീച്ചിൽ ഉച്ചകഴിഞ്ഞ് മൂന്നിനും നടക്കും.

എല്ലാ വേദികളിലും വൈവിദ്ധ്യമാർന്ന കലാവിരുന്ന് ഒരുക്കിയിട്ടുണ്ട്. മുഖ്യമന്ത്രിയും മന്ത്രിമാരും എത്തുന്നതിന് മുമ്പായാണ് കലാപരിപാടികൾ അരങ്ങേറുക. മുണ്ടക്കയം സെന്റ് മേരീസ് ലാറ്റിൻ ചർച്ച് ഗ്രൗണ്ടിൽ രാവിലെ 11.30 മുതൽ രാഹുൽ കൊച്ചാപ്പിയുടെ നേതൃത്വത്തിൽ നാടൻപാട്ട്, കുമ്മാട്ടിക്കളി, ട്രൈബൽ ഡാൻസ്, തെയ്യം തിറ. പൊൻകുന്നം ഗവൺമെന്റ് ഹയർസെക്കൻഡറി സ്‌കൂളിൽ ഉച്ചയ്ക്ക് രണ്ടിന് കാഞ്ഞിരപ്പള്ളിയിലെ സാംസ്കാരിക കൂട്ടായ്മയായ സംസ്‌കൃതി വോയ്‌സ് അവതരിപ്പിക്കുന്ന ഗാനമേള, തുടർന്ന് മിമിക്‌സ് കേരള മിമിക്‌സ് പരേഡ്.