ചങ്ങനാശേരി: മന്നം ജയന്തി ആഘോഷം ജനുവരി ഒന്ന്, രണ്ട് തീയതികളിലായി പെരുന്നയിലെ എൻ.എസ്.എസ് ആസ്ഥാനത്ത് നടക്കും. പെരുന്നയിലെ വിദ്യാഭ്യാസ സമുച്ചയ മൈതാനിയിൽ തയാറാക്കിയ മന്നംനഗറിലാണ് ആഘോഷം. 30,000 പേർക്ക് ഇരിക്കാവുന്ന പന്തലിന്റെ നിർമ്മാണം പൂർത്തിയായി. മന്നം സമാധിയിലെയും ആസ്ഥാന മന്ദിരത്തിലെയും വൈദ്യുതി ദീപാലങ്കാര ജോലികൾ അവസാനഘട്ടത്തിലാണ്.
മോടിപിടിപ്പിക്കലും പ്രവേശനകവാടത്തിന്റെയും പ്രധാന വേദിയുടെയും പണികളും അന്തിമഘട്ടത്തിലാണ്. സംസ്ഥാനത്തിന്റെ വിവിധ ഭാഗങ്ങളിൽ നിന്നെത്തുന്ന കരയോഗ ഭാരവാഹികൾക്കും പ്രവർത്തകർക്കും താമസിക്കുന്നതിന് എൻ.എസ്.എസ് വിദ്യാഭ്യാസ സമുച്ചയങ്ങളിൽ സൗകര്യമൊരുക്കി. സ്ത്രീകൾക്ക് വനിതാ ഹോസ്റ്റലിലാണ് താമസ സൗകര്യമൊരുക്കിയത്. എൻ.എസ്.എസ് ഹിന്ദു കോളേജ് മൈതാനത്ത് വിശാലമായ ഊട്ടുപുരയും തയാറാക്കി.