കാട്ടാക്കട: മണ്ഡലത്തിൽ നടപ്പാക്കി വരുന്ന ജലസമൃദ്ധി,ഒപ്പം,കൂട്ട്,കാർബൺ ന്യൂട്രൽ കാട്ടാക്കട,കെ.ഐ.ഡി.സി,കാട്ടാൽ എഡ്യൂകെയർ എന്നീ പദ്ധതികളുടെ ഭാഗമായി ഇന്ന് മണ്ഡലത്തിലെ വിദ്യാർത്ഥികളെ ഉൾപ്പെടുത്തി ' സ്റ്റുഡന്റ് കോൺക്ലേവ് ' സംഘടിപ്പിക്കുന്നു. നിയമസഭാ പ്രവർത്തനത്തിന്റെ മാതൃകയിൽ വിദ്യാർത്ഥികൾ മന്ത്രിമാരും എം.എൽ.എമാരുമായി സഭാചുമതല നിർവഹിക്കുന്ന തരത്തിലാണ് കോൺക്ലേവ് സംഘടിപ്പിക്കുന്നത്.

ഭാവികേരളം രൂപപ്പെടുത്തുന്നതിന് സഹായകരമാകുന്ന പദ്ധതികളും മണ്ഡലത്തിൽ നടപ്പിലാക്കി വരുന്ന പദ്ധതികളും വിദ്യാർത്ഥി സഭാ പ്രതിനിധികൾ ചർച്ച ചെയ്യുന്ന തരത്തിലാണ് കോൺക്ലേവ് സംഘടിപ്പിക്കുന്നത്. രാവിലെ 9.30 മുതൽ വൈകിട്ട് 3 വരെയാണ് പരിപാടി. കോൺക്ലേവിനോടനുബന്ധിച്ച് ശുചിത്വമിഷന്റെ ആഭിമുഖ്യത്തിൽ ചിത്രരചനാ മത്സരം സംഘടിപ്പിക്കും. ശാസ്‌ത്രോത്സവത്തിൽ മികവ് തെളിയിച്ച വിദ്യാർത്ഥികൾ സംഘടിപ്പിക്കുന്ന ശാസ്ത്ര എക്‌സിബിഷനും ഫോട്ടോ പ്രദർശനവുമുണ്ടായിരിക്കും. പരിപാടിയിൽ പങ്കെടുക്കുന്ന വിദ്യാർത്ഥികളിൽ നിന്ന് നവകേരള സൃഷ്ടിക്ക് മുതൽകൂട്ടാകുന്ന ആശയ സ്വരൂപണമുണ്ടാകും.

മികച്ച ആശയങ്ങൾ അവതരിപ്പിക്കുന്ന വിദ്യാർത്ഥികൾക്ക് സമ്മാനവുമുണ്ട്. മലയിൻകീഴ് ബാങ്ക് ഓഡിറ്റോറിയത്തിൽ സംഘടിപ്പിക്കുന്ന പരിപാടിയുടെ സമാപന സെഷനിൽ മുഖ്യമന്ത്രിയുടെ അഡിഷണൽ പ്രൈവറ്റ് സെക്രട്ടറി മേജർ ദിനേശ് ഭാസ്‌കർ, പ്രശസ്‌ത കവി മുരുകൻ കാട്ടാക്കട എന്നിവർ വിദ്യാർത്ഥികളുമായി സംവദിക്കും. നവകേരള രൂപീകരണത്തിൽ പുതു തലമുറയുടെ പങ്കാളിത്തവും ആശയങ്ങളും ഉൾപ്പെടുത്തുന്നതിനും മണ്ഡലത്തിലും കേരളത്തിലാകെയും നടക്കുന്ന പദ്ധതികൾ വിദ്യാർത്ഥികൾക്ക് പരിചയപ്പെടുത്തുന്നതും ലക്ഷ്യമിട്ടാണ് കോൺക്ലേവ് സംഘടിപ്പിക്കുന്നതെന്ന് ഐ.ബി.സതീഷ് എം.എൽ.എ അറിയിച്ചു.