സംസ്ഥാനത്ത് സ്വർണ വില കുത്തനെ ഉയർന്നു. ഇരുപത്തിരണ്ട് കാരറ്റ് ഒരു പവൻ സ്വർണത്തിന് 600 രൂപയാണ് ഇന്ന് കൂടിയത്. ഇതോടെ പവന് 46,760 രൂപയായി ഉയർന്നു. ഗ്രാമിന് 75 രൂപ കൂടി 5,845 ആയി. സർവകാല റെക്കോർഡാണിത്. ഇന്നലെ 46,160 രൂപയിലാണ് വ്യാപാരം നടന്നത്.

ബുധനാഴ്ച വ്യാപാരം നടന്ന പവന് 45,920 രൂപയായിരുന്നു നിലവിലെ റെക്കോർഡ്. ഈ റെക്കോർഡ് മറികടന്നാണ് ഇന്ന് 46,760 രൂപയിലെത്തിയത്. ഇതിന്റെ കൂടെ പണിക്കൂലിയും ജി എസ് ടിയും കൂടി വരുമ്പോൾ ഒരു പവൻ വാങ്ങണമെങ്കിൽ അരലക്ഷത്തിലധികം കൊടുക്കേണ്ടി വരും. വരും ദിവസങ്ങളിൽ ഇനിയും വില കൂടുമോയെന്നാണ് സ്വർണ പ്രേമികൾ ചോദിക്കുന്നത്.

ഇരുപത്തിനാല് കാരറ്റ് ഒരു പവൻ സ്വർണത്തിന് ഇന്ന് 648 രൂപയാണ് കൂടിയത്. 51,008 രൂപയിലാണ് വ്യാപാരം നടക്കുന്നത്. ഗ്രാമിന് 81 രൂപ കൂടി 6,376 രൂപയായി. പതിനെട്ട് കാരറ്റ് ഒരു പവൻ സ്വർണത്തിന് 488 രൂപയാണ് ഇന്ന് കൂടിയത്. 38,256 രൂപയ്ക്കാണ് വ്യാപാരം നടക്കുന്നത്. ഗ്രാമിന് 61 രൂപ കൂടി 4,782 രൂപയായി.