മുംബയ്: 31കാരിയായ മെക്സിക്കൻ യുവതിയെ നിരന്തരമായി പീഡിപ്പിച്ച കേസിൽ യുവാവ് അറസ്​റ്റിൽ. ഡിസ്‌ക് ജോക്കിയായ (ഡിജെ) യുവതിയെ പീഡിപ്പിച്ചതിന് കഴിഞ്ഞ ദിവസമാണ് ബാന്ദ്ര പൊലീസ് പ്രതിയെ അറസ്​റ്റ് ചെയ്തത്. അറസ്​റ്റിലായ യുവാവും ഡിസ്‌ക് ജോക്കിയാണ്.

കഴിഞ്ഞ ആഴ്ച യുവതി നൽകിയ പരാതിയിലാണ് അറസ്റ്റ്. 35കാരനായ ഇയാൾ 2019 മുതൽ യുവതിയെ നിരന്തരമായി പീഡിപ്പിച്ചിട്ടുണ്ടെന്നും പരാതിയിൽ പറയുന്നു. ഇരുവരും മുംബയിലാണ് താമസിക്കുന്നത്. സോഷ്യൽ മീഡിയയിലൂടെ 2017ലാണ് ഇരുവരും പരിചയത്തിലാകുന്നത്. 2019 ജൂലായിൽ യുവതിയെ ഇയാൾ ബാന്ദ്രയിലുളള വീട്ടിൽ വിളിച്ചുവരുത്തി പീഡിപ്പിക്കുകയായിരുന്നു. പ്രതി യുവതിയെ പല തവണകളായി പീഡിപ്പിച്ചിട്ടുണ്ടെന്ന് പൊലീസ് പറഞ്ഞു.

പ്രതി യുവതിയെ ഭീഷണിപ്പെടുത്തിയിരുന്നതായും പൊലീസ് വ്യക്തമാക്കി. നഗ്നചിത്രങ്ങൾ കാണിച്ച് യുവാവ് പണം തട്ടിയെടുക്കാനും ഭീഷണിപ്പെടുത്താനും ആരംഭിച്ചതോടെയാണ് യുവതി പൊലീസിൽ പരാതി നൽകിയത്. 2020ൽ മ​റ്റൊരു സ്ത്രീയുമായി പ്രതിയുടെ വിവാഹം കഴിഞ്ഞിരുന്നു, തുടർന്നും ഇയാൾ യുവതിയെ പീഡിപ്പിച്ചതായി പരാതിയിൽ പറയുന്നു. പ്രതിക്കെതിരെ പീഡനം, ഭീഷണിപ്പെടുത്തൽ തുടങ്ങിയ കു​റ്റങ്ങൾ ചുമത്തി കേസ് രജിസ്റ്റർ ചെയ്തിട്ടുണ്ടെന്ന് ബാന്ദ്ര പൊലീസ് മാദ്ധ്യമങ്ങളോട് പറഞ്ഞു.