ധാക്ക: ബംഗ്ലാദേശിൽ റിക്ടർ സ്കെയിലിൽ 5.5 തീവ്രതയിൽ ഭൂചലനം. ആളപായമോ നാശനഷ്ടമോ ഇല്ല. ഇന്നലെ ഇന്ത്യൻ സമയം രാവിലെ 9.5ന് ഭൗമോപരിതലത്തിൽ നിന്ന് 10 കിലോമീറ്റർ ആഴത്തിലായിരുന്നു ചലനം. ലക്ഷ്‌മിപൂർ ജില്ലയിലെ റാംഗഞ്ചിന് കിഴക്ക് 8 കിലോമീറ്റർ അകലെയാണ് പ്രഭവ കേന്ദ്രം. തലസ്ഥാനമായ ധാക്കയിലും ഇന്ത്യയിൽ പശ്ചിമ ബംഗാൾ, ത്രിപുര, മിസോറാം, അസാം എന്നിവിടങ്ങളിലും പ്രകമ്പനം രേഖപ്പെടുത്തി. ഇന്ത്യയിൽ ലഡാക്കിലും ഇന്നലെ ഭൂചലനം അനുഭവപ്പെട്ടിരുന്നു. രാവിലെ 8.25ന് റിക്ടർ സ്കെയിലിൽ 3.4 തീവ്രതയിലാണ് ഭൂചലനമുണ്ടായത്.