ചെന്നൈ: നടി തൃഷയ്ക്കെതിരെ അപകീർത്തികരമായ പരാമർശം നടത്തുകയും പിന്നീട് മാപ്പ് പറയുകയും ചെയ്ത നടൻ മൻസൂർ അലി ഖാൻ മാനനഷ്ടക്കേസുമായി ഹൈക്കോടതിയെ സമീപിച്ചു. തൃഷ,​ നടിയും ദേശീയ വനിതാ കമ്മിഷൻ അംഗവുമായ ഖുശ്ബു,​ നടൻ ചിരഞ്ജീവി എന്നിവർ ഒരു കോടി രൂപ വീതം നഷ്ടപരിഹാരം നൽകണമെന്നാണ് ആവശ്യം. തമാശയ്ക്ക് പറഞ്ഞ കാര്യങ്ങൾ എഡിറ്റ് ചെയ്ത് പ്രചരിപ്പിച്ചു. യഥാർത്ഥ വീഡിയോ കാണാതെ തനിക്കെതിരെ അപകീർത്തികരമായ പരാമർശങ്ങൾ താരങ്ങൾ നടത്തിയെന്നും പരാതിയിൽ മൻസൂർ ആരോപിക്കുന്നു.

അടുത്തിടെ പുറത്തിറങ്ങിയ ലിയോ സിനിമയുമായി ബന്ധപ്പെട്ട അഭിമുഖത്തിനിടെ തൃഷയെക്കുറിച്ച് മൻസൂർ നടത്തിയ പരാമർശമാണ് വിവാദമായത്. വൻ പ്രതിഷേധം ഉയർന്നതോടെ നടൻ മാപ്പ് പറഞ്ഞ് രംഗത്തെത്തിയിരുന്നു. മാപ്പ് തൃഷ സ്വീകരിക്കുകയും ചെയ്‌തു. സംഭവത്തിൽ സ്വമേധയാ ഇടപെട്ട വനിതാ കമ്മിഷൻ കേസെടുക്കാൻ പൊലീസിനോട് നിർദ്ദേശിച്ചിരുന്നെങ്കിലും കേസുമായി മുന്നോട്ട് പോകാൻ താത്പര്യമില്ലെന്ന് തൃഷ അറിയിക്കുകയായിരുന്നു.

വിഷയം അവസാനിച്ചെന്ന് കരുതിയപ്പോഴാണ് മാനനഷ്ടക്കേസുമായി മൻസൂർ കോടതിയെ സമീപിക്കുന്നത്.